Փախստականների հարցերով գերագույն հանձնակատարն անհանգստացած է ԼՂ համակարտության վերսկսման փաստով

ՄԱԿ-ի Փախստականների հարցերով գերագույն հանձնակատարի գրասենյակը հանդես է եկել Լեռնային Ղարաբաղի շուրջ լարվածության հետ կապված հայտարարությամբ, որում ասվում է, որ ԼՂ-ում վերջին մարտերի հետևանքով մի քանի հարյուր մարդ, հիմնականում կանայք, երեխաներ ու մեծահասակ մարդիկ լքել են իրենց բնակավայրերը` կոչ անելով կողմերի ն «ապահովել նրանց իրավունքների պաշտպանությունը»:

Ինչպես հաղորդում է «Արմենպրես»-ը, հայտարարության մեջ ասվում է. «ՄԱԿ-ի Փախստականների հարցերով գերագույն հանձնակատարն անհանգստացած է հակամարտության վերսկսման փաստով, որի արդյունքում մի քանի տասնյակ մարդ է սպանվել, մեծաթիվ քաղաքացիներ նորից ստիպված են եղել լքել իրենց տները»:

Նշվում է, որ նրանցից ոմանք վերջին երկու տասնամյակում մի քանի անգամ հեռացել են իրենց տներից: Ասվում է, որ վերջին լարվածության ժամանակ մարդկանց մի մասը հեռացել է դեպի Լեռնային Ղարաբաղի ավելի ապահով բնակավայրեր կամ Հայաստան, ոմանք էլ` դեպի Ադրբեջանի ավելի ապահով վայրեր:

ՄԱԿ-ի գերագույն հանձնակատարը «բոլոր կողմերին» կոչ է անում հարգել ավելի ապահով վայրեր տեղափոխվելու մարդկանց իրավունքը եւ նրանց անհրաժեշտ պաշտպանություն ցուցաբերել:

ՄԱԿ-ի Փախստականների հարցերով գործակալությունն իր օժանդակությունն է առաջարկում Հայաստանի եւ Ադրբեջանի կառավարություններին` նոր տեղահանված անձանց կարիքները հոգալու համար: