Շիրակ Թորոսյանը` «Միացյալ ազգային շարժում» կուսակցության հակահայ վարքագծի մասին

«Ջավախք» հայրենակցկան միության նախագահ, ԱԺ պատգամավոր Շիրակ Թորոսյանը անդրադարձել է Վրաստանի «Միացյալ ազգային շարժում» կուսակցության հակահայ վարքագծին:

Մասնավորապես, Թորոսյանը հայտարարության մեջ ասել էր հետեւյալը.

«Հայ ժողովրդի համար վերջին բախտորոշ օրերին հարեւան Վրաստանի իշխանությունների հավասարակշիռ եւ չեզոք դիրքորոշումը բարձր գնահատվեց Հայաստանի կողմից: Սակայն, ցավոք, Վրաստանի նախկին նախագահ Մ. Սաակաշվիլիի գլխավորած «Միացյալ ազգային շարժում» կուսակցությունը շարունակում է իրեն բնորոշ հակահայ վարքագիծը: Որպես ասվածի ցցուն ապացույց` մեջբերեմ վերոնշյալ կուսակցության անդամ, Վրաստանի խորհրդարանի պատգամավոր Գեորգի Գաբաշվիլիի ապրիլի 8-ին տարածած հայտարարությունը. «Մենք աջակցում ենք լարվածության թուլացմանն ու հակամարտության վերջնական խաղաղ կարգավորմանը: Հիմնական հարցն այն է, որ հակամարտության կարգավորումը պետք է հիմնված լինի տարածքային ամբողջականության հիմնարար սկզբունքի (այս դեպքում` Ադրբեջանի) ապահովմամբ …»: Ուզում եմ հիշեցնել հակամարտության խաղաղ կարգավորման «ջատագով» պատգամավորին, որ ԼՂՀ կոնֆլիկտի պարագայում անաչառությունը ենթադրում է, որ առնվազն պետք էր նախ՝ խոսել ազգերի ինքնորոշման, ինչպես նաեւ ուժի եւ ուժի սպառնալիքի չկիրառման սկզբունքների մասին, որոնք այնպես ջանադրաբար մերժում են Ադրբեջանն ու նրա հովանավորները: Ավաղ, Սահակաշվիլիի կուսակցությունը՝ ուր, անաչառությունն ու սկզբունքները` ուր: Այս կուսակցությունը խիստ «սկզբունքորեն» իր տխրահռչակ կառավարման 10 տարիների ընթացքում «հաջողեցրեց» Վրաստանն ընկղմել թուրք-ադրբեջանական տնտեսա-քաղաքական էքսպանսիայի ճահճի մեջ, որից դուրս գալու համար մեր հարեւան երկրին երկար ժամանակ եւ շատ ջանքեր անհրաժեշտ կլինեն, էլ ուր մնաց՝ զարմանանք նրա անդամների ադրբեջանանպաստ ճամարտանքների համար: Ինչպես ասում են` կարմիր կովը կաշին չի փոխի: Ամեն դեպքում, այս մարդկանց շատ տխուր ապագա է սպասվում, որը պայմանավորված է տեսանելի հեռանկարում խավիարի սպառման վստահ կանխատեսումներով»: