Գեղարքունիքի մարզի համայնքներն ու կազմակերպությունները շարունակում են օգնությունն Արցախին

Գեղարքունիքի մարզպետարանի համայնքներն ու կազմակերպությունները շարունակում են ամենատարբեր կարգի օգնությունն Արցախին, առաջնագծում գտնվող զինվորներին ու կամավորներին:

Ինչպես «Արմենպրես»-ին տեղեկացրեցին Գեղարքունիքի մարզպետարանի աշխատակազմից, արդեն համապատասխան հաշվեհամարին Գեղարքունիքի մարզպետ Ռաֆիկ Գրիգորյանի եւ մարզպետարանի աշխատակիցների կողմից հանգանակվել եւ փոխանցվել է 1 միլիոն 250 հազար դրամ: 200 հազար դրամ հանգանակել եւ համապատասխան հաշվին են փոխանցել Գանձակի գյուղապետ Վանիկ Հարությունյանն ու գյուղապետարանի աշխատակիցները: Մեքենաներով բեռնված սննդամթերք, հագուստ, ծխախոտ, առաջին անհրաժեշտության պարագաներ են Արցախ հասցվել Վարդենիկի, Գանձակի, Գեղհովիտի, Մադինայի, Սեւանի քաղաքապետարանի եւ տարածքի համայնքների  գյուղապետարանների եւ բնակիչների հանգանակություններով: Արդեն 2-րդ անգամ Նորատուսի եւ շրջակա համայքների երիտասարդներին համախմբելով՝ Արցախին բեռնված մեքենաներով սնունդ է հասցնում Նորատուս գյուղի բնակիչ Հայկ Հակոբյանը: Առաջիկա մեկ-երկու օրերի ընթացքում սննդով ու առաջին անհրաժեշտության պարագաներով բեռնված մեքենաները տեղ կհասնեն Ծակքարից, Ծովասարից, Գավառի Հացառատ թաղամասից, Գեղարքունիք եւ Լանջաղբյուր գյուղերից:

«Մարզի բնակչությունը՝ մեծից փոքր, հոգով ու սրտով Արցախ աշխարհի մեր հայրենակիցների, մեր հերոս զինվորների հետ են: Դեռ Արցախի պաշտպանական դիրքերում են մեր քաջ կամավորները, իսկ հարյուրավոր ազատամարտիկներ ու երիտասարդներ հերթագրվել ու սպասում են կանչի, ամեն մեկը ցանկանում է ինչ-որ կերպ օգնության ձեռք մեկնել փորձության մեջ հայտնված Արցախին»,-նշեց Գեղարքունիքի մարզպետի տեղակալ Անդրանիկ Հակոբյանը: