Ասեց՝ հանգիստ քնեք, ամեն ինչ վերահսկում ենք. 23-ամյա Մերուժանը 25 ադրբեջանցու դեմ էր ելել

News.am-ը գրում է.

Գյումրիում այսօր՝ ապրիլի 6-ին, Սուրբ Նշան եկեղեցում տեղի ունեցավ ադրբեջանական ագրեսիան հետ մղելիս զոհված ավագ լեյտենանտ 23-ամյա ՝ Մերուժան Ստեփանյանի  հուղարկավորության արարողությունը: NEWS.am-ի թղթակիցը հաղորդում է, որ հուղարկավորությանը ներկա էին մարզային ու քաղաքային իշխանությունները, Ռազմական ոստիկանության բարձրաստիճան պաշտոնյաներ, ՊԲ սպաներ եւ հարյուրավոր գյումրեցիներ, որոնք եկել են իրենց վերջին հրաժեշտը տալու հերոս զինվորին:

NEWS.am-ի հետ զրույցում Մերուժանի բարեկամուհին պատմեց, որ նրա հետ խոսել էր ապրիլի 1-ին: «Զանգեցի, ասի՝ բալա, ի՞նչ կա ձեր մոտ, սաղ լա՞վ է, հո չեն կրակել, ասեց՝ չէ հանգիստ քնեք, մենք ամեն բան վերահսկողության տակ ենք պահում: Զատիկին եկավ ուրախ, ժպիտը դեմքին, նշանածի հետ էր»,-ասաց բարեկամուհին:

Մերուժանի մորեղբայրն էլ պատմեց, որ տղան ժամկետային ծառայությունից հետո, ցանկություն է հայտնել մնալ ծառայության մեջ եւ պաշտպանել սահմանը: «Ինքն էնքան համեստ տղա էր, երբեք չէր դժգոհում, չէր բողոքում, սիրում էր կյանքը, սիրում էր մարդկանց: Ինքն ուզեց ծառայել առաջին գծում ու գնաց առանց մեկիս հետ խոսել. երբեք դժգոհ չէր, հայրենասիրությունն իր արյան մեջ էր, հերն էլ կռված տղա, ինքը տղեքին մենակ թողնողը չէր, փախնող էլ չէր»,-ասաց մորեղբայրը:

Մերուժանի հուղարկավորությանը մասնակցելու էր եկել էր նաեւ Թալիշից մի տղամարդ, որը պատմեց որ իր որդին ճանաչել է Մերուժանին: «Էդ դեպքի օրը գիշերը 3-ն էր, երբ թուրքը հարձակվեց, իմ տղես էլ է սպա: Մերուժանը  հերոս տղա է, ինքը իր զորքով 25 թուրքի դեմ է պայքարել կռվել, ու դրանց վերացրել, բայց ափսոս սպանվել են դաժանաբար»,-ասաց թալիշցի տղամարդը՝ ով չցանկացավ ներկայանալ:

 Նշենք, որ Մերուժան Ստեփանյանը  ընտանիքի միակ որդին էր եւ ուներ մեկ քույր: Նա այս տարի հունվարին նշանվել էր եւ պատրաստվում էր հարսանիքի: Մերուժանի հայրը 1990-ականների սկզբին նույնպես մասնակցել է Ղարաբաղյան պատերազմին: