Ադրբեջանական կողմն ուղղակի ցանկանում է անկայունացնել տարածաշրջանը. Իտալացի սենատոր

Իտալիայի հանրային սենատի անդամ Ալդո դի Բիաջոն հանդես է եկել հայտարարությամբ, որտեղ դատապարտել է պաշտոնական Բաքվի գործողությունները` նշելով, որ խնդիրը հենց այս պահին կարիք ունի ավելի արագ եւ կտրուկ արձագանքի: Վերջին օրերի՝ ղարաբաղա-ադրբեջանական սահմանին տեղի ունեցող զարգացումներն աննկատ չեն մնացել իտալացի սենատորի տեսադաշտից:

«Ղարաբաղա-ադրբեջանական շփման գծում ռազմական հակամարտության վերսկսումը կրկին միջազգային մակարդակով թարմացնում է չլուծված խնդիրը` իր վրա նորովի ուշադրություն հրավիրելով: Բաքվի ցուցաբերած սադրանքները եւ թուրքական կառավարության դերն այդ հարցում վտանգում են տարածաշրջանի կայունությունը: Դա վտանգ է նաեւ համաշխարհային քաղաքականության հետագա ընթացքի համար»,- ասել է իտալացի սենատորը:

Վերջինս անդրադարձել է նաեւ Ադրբեջանի կողմից անհավասարաչափ ռազմական ուժի կիրառմանը, ծանր զրահատեխնիկայի կիրառմանը` կոչ անելով վերջ տալ վայրագությանն ու դաժանությանը` թույլ տալով քաղաքացիական բնակչությանը խաղաղ ապրել տարածաշրջանի սահմանային գյուղերում: Դի Բիաջոն եզրակացնում է, որ ադրբեջանական կողմն ուղղակի ցանկանում է անկայունացնել տարածաշրջանը` դիվանագիտական հարթակից խնդրի կարգավորումը վերածելով ռազմական բախումների:

«Պետք է թողնել, որ Մինսկի խումբը հնարավորինս մեծացնի ազդեցությունը: Իտալիան, որպես խմբի անդամ, պետք է ամեն բան ձեռնարկի, որպեսզի այս տեղային բախումները չընդարձակվեն` դոմինոյի էֆեկտ ունենալով տարածաշրջանային զարգացումներում»,- հավելել է սենատոր դի Բիաջոն: