Ադրբեջանի արյան կենտրոնական բանկը վիրավոր զինծառայողների համար արյուն չունի

ԼՂՀ-ի դեմ Ադրբեջանի զինված ուժերի կողմից ապրիլի 2-ից սկսված սադրիչ ռազմական գործողություններին ԼՂՀ պաշտպանության բանակի հասցրած պատասխան ջախջախիչ հարվածներից մեծաթիվ վիրավոր զինծառայողների համար Ադրբեջանի առողջապահության նախարարությանը կից Արյան կենտրոնական բանկն այլեւս արյուն չունի:

Ինչպես հաղորդում է «Արմենպրես»-ը, դա են վկայում սոցցանցերում վիրավոր ադրբեջանցի զինվորականների համար շտապ արյուն հանձնելու կոչերն ու  խնդրանքները:

Modern.az կայքը հայտնում է, որ դրա հետ կապված Ադրբեջանի արյան կենտրոնական բանկը հանդես է եկել հայտարարությամբ, որում հայտնել է, որ մեծ քանակությամբ արյուն են ուղարկել Թարթառի, Սարըջալիի, Նավթալանի, Բարդայի, Շաքիի հոսպիտալներ եւ հիվանդանոցներ:

Կայքը հայտնում է, որ Արյան կենտրոնական բանկը, որը հայտնվել է արյունը վերջանալու ռիսկի տակ, պատրաստվում է հանդես գալ արյուն տալու համար բնակչությանն ուղղված կոչով:

Ադրբեջանական minval.az լրատվական կայքն այսօր հայտնել է, որ Ադրբեջանի զինված ուժերի գլխավոր կլինիկական հոսպիտալը Facebook-ում «Ուշադրություն: Շտապ արյուն է պահանջվում վիրավոր զինծառայողների համար» բովանդակությամբ հայտարարություն է տեղադրել:

Նշվում է, որ ավելի շատ արյուն պահանջվում է բացասական ռեզուս գործոնով: Բոլորին, ովքեր կարող են դոնոր դառնալ, խնդրվում է արյուն հանձնել հոսպիտալում:

Ադրբեջանը չի հայտնում ապրիլի 2-ի գիշերվանից ԼՂՀ-ի դեմ սկսած ռազմական սադրանքին ի պատասխան հայկական ուժերի հարվածների արդյունքում վիրավոր զինծառայողների թիվը:

ԼՂՀ ՊԲ տվյալներով` վերջին երկու օրվա ընթացքում ձեռնարկված պատասխան հարվածների արդյունքում Ադրբեջանի բանակը 300-ից ավելի զինծառայող է կորցրել եւ շատ ավելի վիրավորներ տվել: Խոցվել է ադրբեջանական երկու ուղղաթիռ, 4 անօդաչու թռչող սարքեր, մոտ 20 տանկ, զրահամեքենաներ եւ այլ ռազմական տեխնիկա: