Որո՞նք են ամենամեծ քաղաքական բլեֆները

Այսօր ապրիլի 1-ն է՝ Հումորի օրը: Ժողովուրդն այն հաճախ ավելի շատ անվանում է «խաբելու օր»:

Past.am-ը զրուցել է քաղաքական գործիչների և քաղաքագետի հետ՝ փորձելով պարզել, թե որոնք են վերջին շրջանի ամենամեծ քաղաքական բլեֆները:

Գերագույն խորհրդի նախկին պատգամավոր Ազատ Արշակյանն ասաց, որ շատ բան կարելի է ասել: «Ամենամեծ բլեֆը, կարծում եմ, Եվրասիական միությանը միանալու մեր ցանկությունն է, որ իբր մենք երկար խնդրում էինք, վերջապես սեպտեմբերի 3-ին դա եղավ»,- նշեց պարոն Արշակյանը:

Տնտեսագետ, Ազգային ժողովի «Բարգավաճ Հայաստան» խմբակցության նախկին պատգամավոր Վարդան Բոստանջյանի կարծիքով՝ բլեֆ են Ընտրական օրենսգրքի շուրջ այսօրվա քննակումները: «Հասկանալի է, որ իշխանությունները բացարձականապես զիջման չեն գնա: Որտեղ էլ զիջման գնան, ապա դա նախապես որոշված է եղել»,- հավելեց նա:

Քաղաքագետ Ստեփան Գրիգորյանը երկու խոշոր բլեֆ է հիշում: Ըստ նրա՝ դասական բլեֆ է Թուրքիայի պայքարն «Իսլամական պետության» դեմ: «Նրանք պայքարում են քրդերի դեմ: Թուրքիան ԱՄՆ-ի հետ մտավ կոալիցիա, որպեսզի պայքարի ԻՊ-ի դեմ, բայց եթե խորը ուսումնասիրում ես, ապա պարզ է դառնում, որ պայքարը Սիրիայի քրդերի դեմ է»,- պնդում է մեր զրուցակիցը: Անդրադառնալով հայաստանյան բլեֆներին՝ քաղաքագետն առանձնացրեց հետևյալը. «Բլեֆ է, որ մեր գազն արժե 165 դոլար: Մեր գազն իրականում արժե 320 դոլար, այլ ոչ 165, ինչպես պնդում է «Գազպրոմը»»:

Լևոն Փանոսյան