Մեկնարկում է երիտասարդ հեղինակ-կատարողների «Հուսո առագաստ» փառատոնը

Մեկնարկում է հեղինակային երգի «Հուսո առագաստ-2015» համահայկական փառատոնը: Փառատոնը նպատակ ունի բացահայտել երիտասարդ հեղինակ-կատարողներին և նրանց բեմում ելույթ ունենալու հնարավորություն տալ: Կազմակերպիչներն են «Բարդերի» ակումբը և Հայաստանի կոմպոզիտորների միությունը:

Ինչպես հայտնում է Past.am-ը, հուլիսի 25-ին «Անդրադարձ» ակումբում նախաձեռնողները հանդիպեցին լրագրողներին և ներկայացրեցին փառատոնի հետ կապված մանրամասներ: Փառատոնի առաջին փուլն անցկացվելու է հուլիսի 31-ից օգոստոսի 2-ը Սևանում, երկրորդ և փուլը՝ օգոստոսի 26-28-ը՝ Դիլիջանի կոմպոզիտորների միության հանգստյան տանը:

«Հուսով եմ, որ այս տարի կկարողանանք ինտեգրել երիտասարդներին, քանի որ փորձը ցույց է տալիս, որ ամեն փառատոնից հետո առնվազն 3-5 հոգի համալրում է հեղինակ-կատարողների մեր բանակը»,- ասաց փառատոնի տնօրեն, երգահան Վախթանգ Հարությունյանը: Խոսելով հաղթողներին տրվող մրցանակների մասին՝ վերջինս տեղեկացրեց, որ մրցանակների հանձնման հանդիսավոր արարողությունը տեղի կունենա Դիլիջանում և կուղեկցվի համերգով:

Նա նշեց, որ լավագույն տասնյակի երգերը կձայնագրվեն կոմպոզիտորների միության ստուդիայում իսկ «Բարդերի» ակումբը կտարածի ձայնսկավառակները: Փառատոնի գեղարվեստական ղեկավար, երգահան Էդվարդ Զորիկյանն էլ իր հերթին տեղեկացրեց, որ մասնակցութան համար տարիքային սահմանափակում չկա:

«Կոնկրետ թեմա չկա, որի շուրջ պետք է երգ ներկայացնեն, միայն պետք է ներկայացնեն հեղինակային երգ»,-ասաց երգահանը: Ըստ նրա՝ փորձը ցույց է տալիս, որ սովորաբար 150-170 դիմում է լինում, որից մոտավորապես 50 տոկոսն առաջին լսումներից դուրս են գալիս, քանի որ այլ ոճի ստեղծագործություն է:

Լևոն Փանոսյան