Էրդողանի թիկնազորը փորձել է լրագրողներին վռնդել Վաշինգտոնում նրա դասախոսությունից

Այցով ԱՄՆ-ում գտնվող Թուրքիայի նախագահ Ռեջեփ Թայիփ Էրդողանի թիկնապահները կոնֆլիկտի մեջ են մտել Վաշինգտոնի համալսարանի Բրուքինգի ինստիտուտում նրա դասախոսությանը եկած լրագրողների հետ:

Այս մասին, ինչպես հաղորդում է «Արմենպրես»-ը, հայտնում է The Financoial Times թերթը` հղում կատարելով ականատեսներին:

Էրդողանի թիկնապահները հայհոյել եւ լրագրողներին թույլ չեն տվել ներկա լինել նրա ելույթին: Վկաները հաստատել են, որ նրանք փորձել են դեռ դասախոսությունը չսկսված դահլիճից հեռացնել լրագրողներին: Գործին միջամտել են ինստիտուտի աշխատակիցները, ովքեր լրագրողներին թույլ են տվել մասնակցել դասախոսությանը: Հաստատության ներկայացուցիչ Գեյլ Չալեֆն ասել է, որ չնայած թիկնապահների հետ վիճաբանությանը, իրենց գնահատականով, միջոցառմանը կարողացել են մասնակցել բոլոր հավատարմագրված լրագրողները:

Միեւնույն ժամանակ ինստիտուտի շենքի մուտքի մոտ հավաքվել են Էրդողանի կողմնակիցներն ու հակառակորդները: Ոստիկանությունը հարկադրված է եղել միջամտել, որպեսզի կանխի թուրքական նախագահի թիկնազորի հետ նրա քննադատների բախումը:

Բրուքինգի ինստիտուտում իր ելույթում Էրդողանը քննադատության է ենթարկելԱՄՆ-ի աջակցությունը սիրիացի քրդերին:

Էրդողանի թիկնազորի վաշինգտոնյան այլ արկածների մասին հայտնել են նաեւ թուրքական ԶԼՄ-ները: Մասնավորապես, թուրքական «Ջումհուրիեթ» թերթը գրել է, որ Վաշինգտոնում Էրդողանի՝ ծիծաղելի վիճակում հայտնված թիկնապահները ծաղրի առարկա են դարձել սոցցանցերում:

Միջուկային գագաթաժողովին մասնակցելու համար Վաշինգտոն ժամանած Թուրքիայի նախագահ Ռեջեփ Թայիփ Էրդողանի թիկնապահները նրա այցի դեմ բողոքի դուրս եկած ցուցարարների հնչեցրած լոզունգների ձայները խլացնելու համար իրենք եւս սկսել են անիմաստ ձայներ արձակել:

Ցուցարարները Էրդողանի իջևանած հյուրանոցի դիմաց «Ահաբեկիչ Էրդողան» բովանդակությամբ պաստառներ են պահել եւ լոզունգներ հնչեցրել:

Էրդողանի թիկնապահները ցուցարարներին սպառնացել են «Թուրքիա չգալ» եւ հայհոյանքներ ու վիրավորանքներ տեղացել նրանց հասցեին: Էրդողանի այցի դեմ բողոքողների եւ նրա թիկնապահների ու կողմնակիցների միջեւ լարվածություն է առաջացել:

Թուրքական ԶԼՄ-ները նաեւ հայտնել են, որ Էրդողանին Վաշինգտոնում որեւէ պաշտոնատար անձ չի դիմավորել: