Կարինե Աճեմյանն Աղաբաբյանի կարծիքի հետ գործ չունի. ըստ պատգամավորի՝ ՀՀԿ-ում հանդուրժող են

Ինչպես հայտնի է, Հանրապետական կուսակցությունը կունենա իր քաղաքական դպրոցը: Հարցազրույցներից  մեկում  ՀՀԿ պատգամավոր Աշոտ Աղաբաբյանն ասել է, որ դրա մեջ տեսնում է դիկտատուրայի դրսևորումներ: Հանրապետական պատգամավոր Կարինե Աճեմյանը Past.am-ի հետ զրույցում նշեց, որ Աղաբաբյանի կարծիքի հետ գործ չունի, ինքն ունի իր կարծիքը:

Ըստ նրա՝ աշխարհում կան նմանատիպ դպրոցներ, որտեղ քաղաքական գործիչները կոփվում են, սովորում են: Տիկին Աճեմյանը համարում է, որ քաղաքականությամբ զբաղվող մարդու համար դպրոցը շատ օգտակար կարող է լինել, որովհետև տեսանելի է, թե երբեմն ինչքան է պակասում փորձը քաղաքական գործչին: Այդ փորձը, ըստ պատգամավորի, ձեռք են բերում կա՛մ կուսակցական աշխատանքով, կա՛մ ընդհանուր գիտելիքներով:

«ՀՀԿ-ն կայացած կուսակցություն է, մեծ կուսակցություն է, այն իրավունք ունի ունենալ իր դպրոցը: Դա որևէ մեկին չպետք է խանգարի: Շատ կարևոր է, թե ինչ հիմքերի վրա է այն դրվում: Մենք փոքր երկիր ենք, բայց մեզ նույնպես պետք են քաղաքական դպրոցներ, որովհետև պառլամենտական համակարգի ձևավորման պարագայում կուսակցությունների դերակատարությունը մեծանում է , շատ կարևորվում է պատգամավորի անձնական գործոնը: Քաղաքական դպրոցն այդ համատեքստում մեծ օգուտ կբերի»,- շեշտեց Կ. Աճեմյանը:

ՀՀԿ փոխնախագահ Արմեն Աշոտյանն առաջարկեց, որպեսզի դպրոցում դասավանդեն նաև ընդդիմադիր քաղաքական գործիչները: Տիկին Աճեմյանից հետաքրքրվեցինք՝ դպրոցում կլինի՞ այդքան լայնախոհություն և ազատություն, որպեսզի ընդդիմադիր դասախոսները անհրաժեշտության դեպքում կարողանան քննադատել Հանրապետական կուսակցությանը, մեր զրուցակիցը պատասխանեց. «Ես կարծում եմ՝ մեր վերջին տարիների անցած ճանապարհը ցույց է տալիս, որ մեր կուսակցությունը հանդուրժող է, բոլոր կարծիքները լսում և հաշվի է առնում:

Համարում եմ, որ դա գրագետ որոշում է: Արդեն իսկ երևում է, որ չի դրվում որևէ խտրականություն: Հիմքերի մասին խոսելով՝ ես հենց դա նկատի ունեի: Շատ կարևոր է՝ ովքեր են դասավանդում: Քաղաքական գործչի համար փորձը շատ կարևոր է: Մենք ինքներս ենք կերտել մեր ճանապարհը, երիտասարդների համար հեշտ կլինի փորձի փոխանակման միջոցով դա անել»:

Լևոն Փանոսյան