Ինչ էր անում Շուշան Պետրոսյանը Բրյուսելում

Անցյալ շաբաթ «Եվրանեսթ» խորհրդարանական վեհաժողովում ՀՀ ԱԺ պատվիրակության անդամները մասնակցել էին «Եվրանեսթ» ԽՎ-ի հինգերորդ լիագումար նիստի աշխատանքներին, իսկ այսօր լրագրողների հետ ասուլիսի ժամանակ պատվիրակության անդամները ներկայացրին կատարված աշխատանքը։

Past.am-ը պատվիրակության նախագահ Արտակ Զաքարյանից հետաքրքվեց, թե ինչ դերակատարություն է ունեցել պատվիրակության աշխատանքներում պատգամավոր Շուշան Պետրոսյանը, ով պատվիրակության հետ մեկնել էր Բրյուսել։ Հետաքրքվեցինք, թե ինչու նա չի եկել ասուլիսի՝ ներկայացնելու իր կատարած աշխատանքը։ Ի պատասխան՝ ՀՀԿ-ական Արտակ Զաքարյանը նշեց, որ «Եվրանեսթին» զուգահեռ կազմակերպվել էր կանանց ֆորում, որին պետք է մասնակցեին պատգամավորներ, որոնք չէին հանդիսանում «Եվրանեսթի» հայկական պատվիրակության անդամ:

«Եվ որոշվեց կանանց ֆորումին մասնակցելու համար հրավիրել Շուշան Պետրոսյանին: Նա շատ հետաքրքիր ելույթ ունեցավ այդ ֆորումում, կանանց մասնակցությամբ սոցիալական նշանակություն ունեցող հարցեր քննարկվեցին»,- նշեց Արտակ Զաքարյանը:

Պատգամավոր Թևան Պողոսյանն էլ հավելեց, որ թեև դա կանանց ֆորում էր, բայց բոլոր մասնակիցներն առաջ էին քաշել ուկրաինացի Սավչենկոյի բանտարկության և նրա իրավունքների հարցը: Շուշան Պետրոսյանը միակն է եղել, որը բարձրաձայնել է չճանաչված տարածքներում, մասնավորաբար, Արցախում ապրող կանանց իրավունքների հարցը: Այժմ Շուշան Պետրոսյանը մեկնել է Մոսկվա` մասնակցելու բարեգործական համերգի` զինվորական հենակետերում կահավորում իրականացնելու համար: '

Լիլիթ Լալայան