Ադրբեջանի ՊՆ-ն հայտնում է երկու զինծառայողի կորստի մասին

Մարտի 27-ին Ադրբեջանի Ղազախի շրջանում սպանվել են ադրբեջանական զինված ուժերի զինծառայողներ, լեյտենանտ Գալիբ Լայիմ օղլու Զուլֆուգարլըն (ծնվ. 1992 թ.) եւ շարքային Գաֆարալի Ինթիգամ օղլու Հաջիեւը (ծնվ.1997 թ.):

Այս մասին հայտնում են ադրբեջանական ԶԼՄ-ները` հղում կատարելով Ադրբեջանի պաշտպանության նախարարության կայքին, որտեղ նշվում է, որ զինծառայողները սպանվել են Հայաստանի հետ սահմանում:

Հետաքրքիր է, որ Ադրբեջանի ՊՆ-ը զինծառայողների մահվան լուրը հայտնել է մարտի 28-ին, երբ այդ մասին հայտնի էր դարձել սոցցանցերում` լեյտենանտ Զուլֆուգարովի` Լենքորանի շրջանի Վիլվան գյուղում հուղարկավորությունից հետո:

Ադրբեջանական ԶԼՄ-ների համաձայն` Ադրբեջանի զինված ուժերում եւ պաշտպանական համակարգի այլ կառույցներում կորուստը 2016 թվականի սկզբից մինչ այժմ կազմել է 11 զինծառայող, 3 զինծառայողներ էլ վիրավորվել են:

ՀՀ ՊՆ մամուլի խոսնակ Արծրուն Հովհաննիսյանը հայտնել էր, որ ոչ աշխատանքային օրերին թե’ հայ-ադրբեջանական, թե’ ղարաբաղա-ադրբեջանական շփման գծում իրավիճակն անհանգիստ է եղել:

«Հանգստյան օրերին սահմանային հատվածում նկատվել է լարվածություն: Կարող ենք ասել, որ Տավուշի մարզի բոլոր սահմանային գյուղերում անհանգիստ է եղել: Ինչպես գիտեք, երկու օր առաջ հակառակորդի կրակոցից քաղաքացիական անձ է վիրավորվել, մեկ այլ քաղաքացու տնտեսությանը հասցվել է մեծ վնաս: Հայկական բանակի գործողությունները եղել են համաչափ, պատասխան է տրվել բոլոր թիրախային կրակոցներին: Համաքրիստոնեական տոներին Ադրբեջանի կողմից իրավիճակի ապակայունացումը, հրադադարի ռեժիմի պահպանման մասին միջազգային կազմակերպությունների հորդորներն անտեսելն անպատասխան չի մնացել», -ասել է ՀՀ ՊՆ մամուլի խոսնակը: