Արտաքնապես նման, բայց էությամբ տարբեր քույրեր (լուսանկար)

Style.news.am-ը գրում է.

NEWS.am STYLE-ը ներկայացնում է արտաքնապես նման հայ երիտասարդների, որոնց տարբերելն այդքան էլ հեշտ չէ։ Այս անգամ մեր հերուսուհիները 23-ամյա Անահիտ եւ Աստղիկ Ֆարադյանները են։ Նրանք երկուսն էլ սովորում են Հայաստանի պետական ճարտարագիտական համալսարանի տեղեկատվական տեխնոլոգիաների ֆակուլտետում։ Արտաքնապես նման, բայց բնավորությամբ տարբեր քույրերն իրենց կյանքն առանց մեկ մեկու չեն պատկերացնում։

«Բնավորությամբ ընդհանրապես նման չեմ քույրիկիս, բայց մեր նախասիրությունները նույն են։ Երկուսս էլ սիրում ենք նույն ֆիլմը դիտել, նույն գիրքը կարդալ, զբաղվել նույն հոբբիով եւ այլն։ Բայց էությամբ ես ավելի ռոմանտիկ եմ, իսկ Աստղիկը՝ ռեալիստ։ Առանց քույրիկիս չեմ կարող պատկերցնել։ Մենք փոքրուց միշտ միասին ենք եղել։ Հիմա երբ աշխատանքի բերումով բաժանվում ենք, անսովոր է»,- ասել է Անահիտը:

Զույգ քույրերը մանկուց երազել են դառնալ դիզայներ․ մեկը՝ հագուստի մոդելավորող, մյուսը՝ ճարտարապետ–դիզայներ։ Նրանք մեզ հետ զրույցում հետաքրքիր պատմություններով կիսվեցին։

«Երբ փոքր էինք, մեզ հանձնարարում էին ինչ-որ բան կարել։ Անկախ մեզանից երկուսս էլ նույն պատկերն էինք նկարում։ Օրինակ՝ ռոբոտ, ամեն մարդ ռոբոտ կարող է տարբեր ձեւ պատկերացնել եւ նկարել, բայց ես ու Անահիտը նույնությամբ նկարում էինք։ Նկարում միակ տարբերությունն այն էր, որ ես ամեն մի պատկեր փոքր էի նկարում, իսկ Անահիտը մեծ»,- պատմեց Աստղիկը։

Աստղիկին ու Անահիտին շատերն են շփոթում։ Ինչպես նրանք նշեցին՝ միայն մտերիմ մարդիկ են տարբերում ով ով է․ «Դպրոցում մի անգամ Աստղիկի փոխարեն ես եմ դասը պատմել եւ ոչ ոք չի նկատել»։

Որքան էլ համերաշխ են նրանք եւ առանց իրար չեն կարողանում իրենց օրն անցկացնել, միեւնույնն է, կոնֆլիկտներ միշտ էլ լինում են։ Նրանք հիմնականում վիճում են, որ մեկը մյուսի զգեստը չհագնի։

«Եթե մենք վիճում ենք, ապա ոչ ոք պետք է չխառնվի, քանի որ մեկ է հինգ րոպե հետո հաշտվում ենք»,- նշեց Աստղիկը։

Մելինե Տոնոյան