Տարածաշրջանում մեկ շաբաթում երեք երկրաշարժ է գրանցվել

Սեյսմիկ պաշտպանության ծառայության (ՍՊԾ) դիտացանցը մարտի 17-ից մինչև 23-ն ընկած ժամանակահատվածում Հայաստանի Հանրապետության տարածքում գրանցել է 3-4 բալ ուժգնությամբ երկրաշարժ (մագնիտուդ 2.8): Այն տեղի է ունեցել մարտի 17-ին Լոռու մարզի Ստեփանավան քաղաքից 9 կմ դեպի հարավ-արևելք: Ստորգետնյա ցնցումները մասնավորապես զգացվել են Ստեփանավան քաղաքում ու Ագարակ գյուղում՝ 3-4 բալ, Վանաձոր և Տաշիր քաղաքներում՝ 2-3 բալ ուժգնությամբ: Այս մասին տեղեկացրին ՍՊԾ-ից:

Տարածաշրջանում 3 բալ ուժգնությամբ գրանցվել է 3 երկրաշարժ, որոնք տեղի են ունեցել մարտի 20-ին: Դրանցից մեկը գրանցվել է Իրանի Խոյ քաղաքից 30 կմ դեպի հարավ-արևմուտք, մյուս երկուսը՝ Թուրքիայում՝ Վան քաղաքից 15 կմ դեպի հյուսիս-արևմուտք և Սարիղամիշ քաղաքից 17 կմ դեպի հարավ-արևմուտք:

Տարածաշրջանից դուրս 6.0 և ավելի մագնիտուդով գրանցվել է 3 երկրաշարժ: Մարտի 19-ին երկրաշարժ է տեղի ունեցել Ալեուտյան կղզեխմբի Ատկա կղզուց 76 կմ դեպի հարավ, որն ունեցել է 6.1 մագնիտուդ: Նույն օրը Անտիգուա և Բարբուդայի մայրաքաղաք Սենթ Ջոնսից 160 կմ դեպի հյուսիս-արևելք գրանցվել է 6.0 մագնիտուդով երկրաշարժ: Մարտի 21-ին 6.4 մագնիտուդով երկրաշարժ է տեղի ունեցել Ռուսաստանում՝ (Կամչատկայի երկրամաս) Կամչատկայի Պետրոպավլովսկ քաղաքից 313 կմ դեպի հյուսիս-արևելք: Քաղաքում ստորգետնյա ցնցումները զգացվել են մինչև 3 բալ ուժգնությամբ: Երկրաշարժերի հետևանքով զոհեր և ավերածություններ չկան: