Հայաստանում առաջիկայում սպավում է ջրային ռեսուրսների նվազում

 Առաջիկա տարիներին Հայաստանում կարող է գրանցվել ջրային ռեսուրսների նվազում:

Այս մասին  է հայտնել  ՀՀ ԱԻՆ «Հայաստանի հիդրոօդերևութաբանության և մոնիթորինգի պետական ծառայության» ՊՈԱԿ հիդրոլոգիայի կենտրոնի պետ Լևոն Ազիզյանը: «Կլիմայի փոփոխության հետևանքով ՀԴՄ ծառայությունում պարբերաբար կատարվում են ջրային ռեսուրսների  խոցելիության գնահատուտմներ: Համաձայն վերջին գնահատումների՝ Հայաստանում մինչև 2030 թ. սպասվում է գետային հոսքի նվազում մոտ 12%-ով, 2070 թ.՝ 24%, 2100 թ.՝ 36-38%»,- նշեց Ազիզյանը:

Գնահատվել է նաև խոշոր ջրամբարների լցվածության խոցելիությունը, որից առավելագույնը սպասվում է Ապարանի ջրամբարում: «Ըստ մեր ունեցած հաշվարկների՝ 2100 թ. Ապարանի ջրամբարը կլցվի ընդամենը 40%, Ախուրյանի ջրամբարը՝ 70%, Ազատի ջրամբարը՝ 60%»,- ասաց մասնագետը: Հիդրոմետ ծառայության կանխատեսած  ջերմային փոփոխությունների սցենարների համաձայն՝ 2100 թ. սպասվում է ջերմաստիճանի աճ՝ մոտ 5 աստիճանով: Դա կհանգեցնի ջրային ռեսուրսների նվազմանը:

Ազիզյանը նաև հավելեց, որ 2012 թ. սկսած Հայաստանում իրար են հաջորդում սակավաջուր տարիներ, իսկ Հրազդանի, Սևանա  լճի և Քասախի ավազաններում նույնիսկ հայտարարվել է երաշտ: Առաջիկա 5 տարին, նրա կանխատեսմամբ, կլինեն ջրառատ ՝ վերջին 5 տարվա համեմատությամբ: Սակավաջրության արդյունքում նվազագույն կորուստներ կրելու համար պետք է մշակվեն հարմարվողական ծրագրեր, խնայողական տեխնոլոգիաներ, ջրի հնարավոր կորուստների նվազեցում, կաթիլային ոռոգում և այլն: