ԱՄՆ-ում ձերբակալվել է Էրդողանի հետ սերտ կապերի մեջ գտնվող գործարար Ռզա Սարաֆը

 ԱՄՆ-ի Մայամի քաղաքում ձերբակալվել է Թուրքիայի նախագահ Ռեջեփ Թայիփ Էրդողանի եւ նրա ընտանիքի անդամների հետ սերտ կապերի մեջ գտնվող եւ 2013 թվականի դեկտեմբերի 1-25-ին Թուրքիայում աղմուկ հանած անօրինականությունների եւ կաշառքի հետաքննություններում առանցքային անուն հանդիսացած ադրբեջանցու արմատներով իրանցի գործարար Ռզա Սարաֆը, ով հանդիսանում է Իրանի եւ Թուրքիայի քաղաքացի:

Այս մասին հայտնում է թուրքական DemokratHaber լրատվական կայքը` նշելով, որ Սարաֆը մեղադրվում է խախտելով Իրանի դեմ պատժամիջոցները ԱՄՆ-ին խաբելու, բանկային կեղծարարությունների եւ միլիարդավոր դոլարների հասնող «կեղտոտ» փողերի լվացման մեջ: Դատախազը նրա համար 75 տարվա ազատազրկման պատիժ է պահանջել:

Նրա հետ միասին ձերբակալվել են եւս երկու իրանցի գործարարներ` 29-ամյա Քամելյա Ջեմշիդին եւ 65-ամյա Հուսեին Նեջաֆզադեն: Թուրքիայի իշխող «Արդարություն եւ զարգացում» կուսակցության եւ նախագահ Էրդողանի հետ սերտ կապերի մեջ գտնվող Սարաֆի եւ մյուս երկու իրանցիների նկատմամբ դատական գործը հարուցվել է Մանհեթենում:

Դատախազությունը յուրաքանչյուր երեք կասկածյալների նկատմամբ ԱՄՆ-ին խարդախության ճանապարհով խաբելու համար 5 տարի ժամկետով, Իրանի դեմ ամերիկյան պատժամիջոցները խախտելու համար 20 տարի, բանկային զեղծարարությունների համար` 30 տարի, սեւ փողերի լվացման համար 20 տարի ժամկետով ազատազրկում է պահանջել:

Թուրքիայում 17-25 դեկտեմբերին անօրինականությունների եւ կաշառքի հետաքննությունների շրջանակում Ռզա Սարաֆը 2013 թվականի դեկտեմբերի 21-ին ձերբակալվել եւ 70 օր մեկուսարանում պահվելուց հետո Էրդողանի միջնորդությամբ ազատ էր արձակվել: Ռզա Սարաֆը Թուրքիայում հայտնի երգչուհի Էբրու Գյունդեշի ամուսինն է:

2013 թ-ի դեկտեմբերի 17-ին տեղի ունեցած «Մեծ կաշառք» հակակոռուպցիոն գործողության ընթացքում կաշառակերության, կոռուպցիայի, ոսկու մաքսանենգության, դրամաշորթության եւ ապօրինությունների մեղադրանքներով 3 նախարարների որդիների, մի շարք բարձրաստիճան պաշտոնյաների եւ գործարարներ Ռեզա Զարրաբի, Ալի Աղաօղլուի հետ միասին ձերբակալվել էին 50-ից ավելի անձինք, որոնք կասկածվում էին Իրանի եւ Ադրբեջանի հետ էներգետիկական համագործակցության բնագավառում մոտ 200 մլրդ դոլար յուրացումների մասնակցության մեջ: Ռեզա Զարաբի հետ կոռուպցիոն կապեր ունենալու մեղադրանք էր առաջադրվել նաեւ Թուրքիայի` Եվրամիության հարցերով այն ժամանակվա նախարար Էգեմեն Բաղըշի նկատմամբ: Գործին ներքաշված լինելու մեջ մեղադրվում էր նաեւ Էրդողանի որդին` Բիլալ Էրդողանը:  

Էրդողանն ու իր գլխավորած ԱԶԿ-ն այդ ամենը կապեցին «Հիզմեթ Հարեքեթի» ազդեցիկ կրոնական կազմակերպության առաջնորդ  Ֆեթուլլահ Գյուլենի համայնքի հետ` պնդելով, թե այն Թուրքիայում դարձել է «զուգահեռ պետություն» եւ վնասում է երկրին:

Էրդողանին հաջողվել էր անմիջապես աշխատանքից ազատել կառավարության 10 նախարարներին եւ գործարարների ու չինովնիկների ձերբակալությունները նախաձեռնած ոստիկանության 500-ից ավելի բարձրաստիճան աշխատակիցների եւ դատական գործեր հարուցել նրանց դեմ` մեղադրելով նրանց գործող վարչակարգի նկատմամբ անհավատարմության մեջ: Էրդողանին այն ժամանակ զայրացրել էր այն, որ ոչ ոստիկանությունը, ոչ էլ դատախազությունն իրեն չեն տեղեկացրել իր գործընկերների գործունեության հետաքննության մասին: Այսպես կոչված «գյուլենականների որսը» Թուրքիայում մինչ օրս շարունա կվում է: