«Փարոսները հայտնի և անհայտ». Հայաստանի պետական ֆիլհարմոնիայում նշվեց Պոեզիայի օրը

1999թ. ՅՈՒՆԵՍԿՕ-ի 30-րդ նստաշրջանի գլխավոր կոնֆերանսում ընդունված որոշմամբ՝ մարտի 21-ը սահմանվել է որպես Պոեզիայի համաշխարհային օր: Այն առաջին անգամ նշվել է Փարիզում՝ ՅՈՒՆԵՍԿՕ-ի կենտրոնակայանում: Մեր երկիրն անմասն չէ տոնական միջացառումներից: Այսօր՝մարտի 21-ին, Հայաստանի պետական ֆիլհարմոնիայի «Առնո Բաբաջանյան» համերգասրահում տեղի ունեցավ գրական-երաժշտական երեկո, որը կրում էր «Փարոսները հայտնի և անհայտ» խորագիրը:

Հայաստանի պետական ֆիլհարմոնիայի տնօրեն Գագիկ Մանասյանը նշեց, որ Հայաստանի պետական ֆիլհարմոնիան թեպետ համերգային կառույց է, սակայն կառույցի ղեկավարությունը արժևորում է ժամանակակից պոեզիան: «Ցանկանում ենք մեր գրողներին, ստեղծագործողներին հնարավորություն ընձեռել ժամանակ առ ժամանակ կապ հաստատել իրենց ընթերցողների հետ: Ստեղծագործող մարդն անընդհատյա կապի մեջ պետք է լինի հանդիսատեսի հետ, որպեսզի նորովի ընկալի կյանքի ռիթմը և այն արտացոլի իր ստեղծագործություններում»,- ընդգծեց պարոն Մանասյանը:

Երեկոյին ներկայացվեցին ինչպես նոր անունների, այնպես էլ ժամանակակից գրականության կայացած բանաստեղծների գործեր` Սոնա Վան, Ղուկաս Սիրունյան, Հուսիկ Արա, Նանե, Խաչիկ Մանուկյան, Էդուարդ Հարենց, Նոնա Պողոսյան, Անի Տեր-Գուլանյան, Բենիկ Ստեփանյան, Նարինե Ավագյան, Առնելա Այվազյան, Ինգա Իսահակյան, Սուսաննա Հայուհի Ղազարյան: Ասմունքեցին Սամվել Թոփալյանը, Անուշ Գալստյանը և հեղինակները: Երաժշտական կատարումներով հանդես եկան Աննա Խաչատրյանը, Պետրոս Շամելյանը, Սրբուհի Ստամբոլցյանը, Արմինե Հայրապետյանը: Երեկոն վարեց գրականագետ Անի Փաշայանը:

Լևոն Փանոսյան