Չավին հրաժեշտ է տվել «Բարսելոնային» ու չի զսպել արցունքներն Ինյեստայի խոսքի ժամանակ (ֆոտոշարք)

«Նոու Կամպ» ստադիոնում կայացել է կատալոնական «Բարսելոնայի» 35-ամյա ավագ Չավի Հերնանդեսի հրաժեշտի պաշտոնական արարողությունը: «Բարսելոնայի» կազմում Իսպանիայի հավաքականի նախկին կիսապաշտպանը վերջին խաղն անցկացնելու է հունիսի 6-ին Բեռլինում, որտեղ Չեմպիոնների լիգայի եզրափակիչում հանդիպելու է Թուրինի «Յուվենտուսի» հետ:

«Կցանկանայի թիմից հեռանալ Չեմպիոնների լիգայի հաղթողի մեդալով: Հուսով եմ՝ ընդմիշտ հրաժեշտ չենք տալիս իրար եւ տեսնվելու ենք նորից: Այստեղ եմ եկել 25 տարի առաջ եւ երբեք մտածել չէի կարող, որ կարիերաս այսպես կդասավորվի: Շատ շնորհակալ եմ «Բարսելոնային» ու երջանիկ եմ լինել թիմի մի մասնիկը»,- ասել է Չավին:

Միջոցառմանը ներկա են եղել Չավիի նախկին ու այժմյան թիմակիցները, ընկերներն ու հարազատները, ինչպես նաեւ «Բարսելոնայի» նախագահ Խոսե Մարիա Բարտոմեուն, փոխանցում է Daily Mail-ը:

Իսպանիայի հավաքականի կիսապաշտպան Անդրես Ինյեստան իր ընկերոջը նվիրել է «Բարսելոնայի» մարզաշապիկ՝ ակումբի բոլոր ֆուտբոլիստների ստորագրություններով: Ինյեստան նաեւ հանդես է եկել շնորհակալական խոսքով, ինչից հետո Չավին չի կարողացել զսպել արցունքները:

«Ավագ, գործընկեր, ընկեր: Դժվար է պատկերացնել, որ հաջորդ մրցաշրջանը սկսելու ենք առանց քեզ: Քո կողքին խաղալը մեծ արտոնություն էր մեզ համար: Շնորհակալություն այն ամենի համար, ինչ դու տվել ես մեզ»,- ասել է Ինյեստան:

Հիշեցնենք, որ այս մրցաշրջանի վերջում Չավին տեղափոխվելու է քաթարյան «Ալ Սադ», որի հետ կնքել է 2 տարվա պայմանագիր: