Ասում էր՝ պատրաստ եմ հանուն ազգի արյունս հողին տամ, իր ասածն արեց. Արցախում զոհված զինծառայողը մարտի 30-ին կդառնար 20 տարեկան

Shabat.am-ը գրում է.

Արցախում հակառակորդի կրակոցից մարտի 17-ին զոհված ժամկետային զինծառայող Արտյոմ Վարդերեսյանը մարտի 30-ին կդառնար 20 տարեկան, իսկ բանակից զորացրվելու էր երեք ամսից՝ հունիսին: Այս մասին Shabat.am-ին փոխանցեց Արտյոմ Վարդերեսյանի հորեղբոր տղաներից մեկը:

«Ինքն իր ասած արեց, մի անգամ նախքան բանակ գնալն ասաց՝ ես պատրաստ եմ արյունս տամ հողին՝ հանուն ազգի ու արեց: Ինքը շատ հայրենասեր էր ու ատ էր սիրում մեր ազգին»,-նշեց եղբայրը: Արտյոմը ընտանիքի ավագն էր ու հորեղբոր տղայի խոսքով, ոչ մի տեղ չէր սովորում, հոգում էր ընտանիքի հոգսերը, բանակից զորացրվելուց հետո էլ մտադրություն ուներ անձնական բիզնես ստեղծել: Արտյոմի հայրը մեկնում է արտագնա աշխատանքի: «Ինքը չէր երազում, երազանքներով չէր ապրուն, ուզում էր բիզնես ստեղծել: Ասում էր՝ ընտանիքն է կյանքի իմաստը, որը մենք ենք կառուցում: Ասում էր՝ կամուսնանամ էն ժամանակ, երբ հստակ կիմանամ, որ կինս ոչնչի պակաս չի զգա: Միգուցե դա էլ իր երազանքն էր՝ ընտանիք կազմել, որը չհասցրեց»,-պատմեց եղբայրը:

Նրա խոսքով, Արտյոմի ծառայությունը շատ լավ, հանգիստ է անցել: Նշենք, որ Արտյոմ Վարդերեսյանը Լոռու մարզի Կաթնաջուր գյուղից էր, ընտանիքի ավագը, ունի երկու քույր:

Ավելի վաղ ԼՂՀ պաշտպանության բանակի մամուլի ծառայությունը հայտնել էր, որ 2016 թվականի մարտի 17-ին, ժամը 14:55-ի սահմաններում հյուսիս-արեւելյան ուղղությամբ տեղակայված զորամասերից մեկի պահպանության տեղամասում, հակառակորդի կողմից արձակված կրակոցից, մահացու հրազենային վիրավորում է ստացել ՊԲ զինծառայող, 19-ամյա Արտյոմ Արսենի Վարդերեսյանը: Դեպքի առթիվ Զինվորական քննչական գլխավոր վարչության երրորդ կայազորային քննչական բաժնում հարուցվել է քրեական գործ: Դեպքի մանրամասները պարզելու համար կատարվում է քննություն: