Սահմանային սադրանքների վերսկսումը նպատակ ունի խաթարել բանակցային գործընթացը. Տիգրան Բալայան

Երեկ՝ հուլիսի 21-ին, Լեռնային Ղարաբաղի Հանրապետության պաշտպանության նախարարությունը հայտարարություն տարածեց, որ շփման գծում անհանգիստ է: Ըստ հայտարարության՝ կողմերի միջև սկսվել էր ինտենսիվ փոխհրաձգություն, սակայն շփման գծի ողջ երկարությամբ հայ դիրքապահները վստահորեն իրականացրեցին իրենց առջև դրված մարտական խնդիրը՝ իրավիճակը պահելով աչալուրջ վերահսկողության տակ:

ԼՂՀ պաշտպանության նախարարությունը հայտարարեց, որ առաջնային գծում ստեղծված լարվածության ողջ պատասխանատվությունը կրում է ադրբեջանական կողմը:

Past.am-ը ՀՀ ԱԳՆ մամուլի խոսնակ Տիգրան Բալայանին հարցրեց՝ երեկվա սահմանի անհանգիստ իրավիճակը պայմանավորվա՞ծ է ԵԱՀԿ Մինսկի խմբի համանախագահների տարածաշրջանային այցով. «Մենք համանախագահների ուշադրությունը հրավիրել ենք ադրբեջանա-ղարաբաղյան շփման գծի ողջ երկայնքով ադրբեջանական զինուժի կողմից տարբեր տրամաչափի զինատեսակներից հրադադարի ռեժիմի խախտումների վրա։ Կարծում ենք, որ սադրանքների վերսկսումը նպատակ ունի խաթարել բանակցային գործընթացը»։

Մեկնաբանելով համանախագահների այցի արդյունավետությունն ու քննարկվելիք հարցերի շրջանակը՝ Բալայանն ասաց. «ԵԱՀԿ Մինսկի խմբի համանախագահների այցելության ընթացքում քննարկումներ են եղել ղարաբաղյան հիմնահարցի խաղաղ կարգավորման գործընթացի շուրջ: Նրանք հայկական կողմին տեղեկացրել են մինչև տարեվերջ իրենց ծրագրերին»։

Լևոն Փանոսյան