Այն գեղեցկուհին, ում բոլորը տիկնիկ են անվանում, իմ աղջիկն է. Լայանան՝ դստեր առաջին տարեդարձի և ատամհատիկի մասին (բացառիկ լուսանկարներ)

Երեկ՝ մարտի 18-ին, երգչուհի Լայանայի համար կրկնակի տոն էր՝ նա տոնում էր իր փոքրիկի առաջին տարեդարձն ու ատամհատիկը: Life.panorama.am-ը տոնական օրվա վերջում զրուցել է երջանիկ մայրիկի հետ եւ մանրամասներ իմացել:

«Էլինան իսկապես լուսավորեց մեր կյանքը, նրա ամեն քայլից, ամեն բառից ու շարժումից աննկարագրելի հուզվում եմ, հավատս չի գալիս, որ նա արդեն մեկ տարի է՝ կա մեր կյանքում. Ճիշտ մեկ տարի առաջ փոքրիկս լույս աշխարհ եկավ ու փոխեց ամեն ինչ, փոխեց անգամ իր բնականոն հունով ընթացող կյանքի գույները: Այսօր դստրիկիս նայում եմ ու հպարատանում՝ այն գեղեցկուհին, ում բոլորը տիկնիկ են անվանում, իմ աղջիկն է.,- պատմեց Լայանան:

Երգչուհին անձամբ էր զբաղվել տոնական օրվա կազմակերպչական հարցերով.

«Նախ պետք է ասեմ, որ ամուսինս ամեն ինչ թողել էր իմ որոշմանը, նա ասում է, որ այդ ամենը մայրիկի գործն է, իսկ այդ հարցում ինձ օգնության էր հասել քույրս՝ Լիաննա Մելքոնյանը: Որոշեցինք ծննդյան խնջույքը կազմակերպել մանկական սրճարանում եւ հրավիրել միայն մայրիկների եւ բալիկների, ստացվեց այնպես, որ միայն մեր հայրիկն էր ներկա: Երեկ շրջապատված էինք մեզ համար շատ թանկ մարդկանցով, ի դեպ նրանց շարքում կային նաեւ հայտնի փոքրիկներ Մոնթեն՝ Աստղիկի եւ Նարբեի որդին, Նոյը՝ Զառա Սահակյանի տղան, երգիչ Արմեն Դավթյանի բալիկները եւ այլք.,- նշեց երգչուհին, ով սիրում է իր եւ աղջկա ոճը համատեղելի դարձնել, իր խոսքերով, որպեսզի հեռվից հեռու հասկանալի լինի, թե Էլինան ում աղջիկն է:

Ինչպես նշեցիքն՝ երեկ ոչ միայն ծննդյան տարդարձ էր, այլեւ ատամհատիկ. Ըստ փոքրիկ Էլինայի ընտրության՝ նա դիվանագետ կամ տնտեսագետ պետք է դառնա.

«Ես ու ամուսինս շատ կցանկանանք, որ աղջիկս լուրջ մասնագիտություն ընտրի, ես առավել շատ կցանկանայի, որ նա բժշկուհի դառնա, քանի որ ինքս էլ էի ուզում ընտրել այդ մասնագիտությունը: Պետք է անկեղծ գտնվեմ եւ ասեմ, որ մեր երկրում երգչուհի լինելը շատ բարդ է, դրա համար այնքան էլ չէի ցանականա, որ աղջիկս իմ ուղին շարունակի, թեպետ նա շատ երաժշտական փոքրիկ է, սիրում է քնել եւ ուտել երաժշտության ներքո»,- պատմեց Լայանան:

Մեզ հետ զրույցում երգչուհին նկատեց, որ փոքրիկն արդեն հասցրել է առաջին քայլերն անել ու բառեր արտասանել.

«Էլինան ծնվել է այծիկի տարում ու մի փոքր կամակոր է, որը հետո կշտկեմ, երբ մի փոքր մեծանա: Արդեն 10 օր է, առաջին քայլերն է անում, ուզում է միայնակ քայլել, բայց դեռեւս վախենում եմ թողնել, որ մենակ քայլի: Աննկարագրելի զգացողություններ ունեցանք, երբ առաջին անգամ արտասանեց մամա, պապա եւ տատա բառերը, հիմա զգում եմ, որ ուզում է  խոսել, բայց դեռ չի կարողանում, ինչպես ասում են՝ մենք արդեն բլբլում ենք.,- ժպիտով պատմեց նա:

«Էլինաս լացկան չէ, նա շատ հեշտ բալիկ է: Չափազանց ժպտադեմ է իմ աղջիկը, շատ է սիրում երեխաների, հենց տեսնում է նրանց, մոտենում ու համբուրում է, ես էլ կատակելով ասում եմ, եթե որոշեմ հաջորդ բալիկիս շուտ ունենալ, դա հատուկ Էլինայի պատվին է լինելու, բայց դե իրականում դրա մասին դեռեւս շուտ է խոսելը»,- զրույցն ավարտեց երգչուհի մայրիկը:

Հեղինակ՝ Անուշիկ Մելքոնյան