Վարդան Արամյանի կինը նոր մեքենա է գնել

Բարձրաստիճան պաշտոնատար անձանց էթիկայի հանձնաժողովը հրապարակել է ՀՀ նախագահի աշխատակազմի ղեկավարի առաջին տեղակալ Վարդան Արամյանի 2015թ. տարեկան հայտարարագիրը:

Արամյանը հայտարարագրել է 52 հազար ամերիկյան դոլարի եւ երեք միլիոն դրամի չափով փոխառություններ: Նրա դրամական միջոցները տարեսկզբին կազմել են 16 միլիոն դրամ եւ 10 հազար ԱՄՆ դոլար, իսկ արդեն տարեվերջին նվազել՝ դառնալով ընդամենը մեկ միլիոն դրամ: Վարդան Արամյանի մեկ տարվա աշխատավարձը 10 միլիոն 134 հազար 671 դրամ է կազմել, տրված փոխառությունների դիմաց ստացված տոկոսը՝ 817 հազար դրամ: Նախագահի աշխատակազմի ղեկավարի առաջին տեղակալը որպես այլ եկամուտից ստացված գումար է նշել ութ հազար 60 եվրոն:

Նրա կնոջ՝ Իզաբելլա Հովհաննիսյանի հայտարարագրից տեսնում ենք, որ պաշտոնյայի կինը նախորդ տարի 3 միլիոն 500 հազար դրամ արժողությամբ MERCEDES-BENZ C230 մակնիշի ավտոմեքենա է ձեռք բերել: Սրանից բացի` Իզաբելլա Հովհաննիսյանն իր հայտարարագրում նշել է 40 հազար ամերիկյան դոլարի չափով փոխառություններ, իսկ իր դրամական միջոցները կազմել են 20 հազար եվրո եւ 40 հազար ԱՄՆ դոլար:

Արամյանի կինը մեկ տարվա համար ստացել է 544 հազար 320 դրամ եւ 16 հազար 632 եվրո աշխատավարձ: Փոխառությունների դիմաց ստացված տոկոսի գումարն էլ կազմել է մեկ միլիոն 832 հազար 220 դրամ: Դեռեւս 2014-ին Արամյանի ընտանիքը մի քանի բնակարան է վաճառել՝ փոխարենը գնելով նորը: Այսպես, Վարդան Արամյանը 2014թ-ին վաճառել է 22 միլիոն 673 հազար դրամ արժողությամբ իր բնակարանը, իսկ նրա կինը՝12 միլիոն դրամ արժողությամբ բնակարանը` փոխարենը ձեռք բերելով ավելի թանկարժեք բնակարան՝ 52 միլիոն 695 հազար դրամ արժողությամբ:

Նշենք, որ Վարդան Արամյանը նախագահի աշխատակազմի ղեկավարի առաջին տեղակալ է նշանակվել 2013թ., մինչ այդ զբաղեցրել է Ֆինանսների նախարարի տեղակալի պաշտոնը, Ֆինանսական համակարգի հաշտարարի գրասենյակի հոգաբարձուների խորհրդի անդամ է եղել:

Քրիստինա Տեր-Մաթեւոսյան