«Ռուս–հայկական երիտասարդական միասնությունը» սիրիահայերին աջակցելու նպատակով կանցկացնի «Դու մենակ չես» ակցիա

«Ռուս-հայկական երիտասարդական միասնություն» հասարակական կազմակերպությունն անցկացնում է բարեգործական ակցիա` ուղղված Հայաստանում սիրիահայ փախստականների աջակցությանը: Ակցիան կրելու է «Դու մենակ չես» խորագիրը: Այս մասին  տեղեկացրեցին «Ռուս-հայկական երիտասարդական միասնություն» հասարակական կազմակերպությունից: Բարեգործական ակցիան անցկացնելու է մարտի 23-ին` Էրեբունի վարչական շրջանում: Մասնակցելու են խոշոր ընկերություններ` տարբեր ոլորտներից: Ներկա են լինելու Հայաստանում ՌԴ արտակարգ և լիազոր դեսպան Իվան Վոլինկինը, Հայաստանում Սիրիայի դեսպանության ժամանակավոր հավատարմատար Իսսամ Նայալը, քաղաքապետ Տարոն Մարգարյանը, Երևանում «Ռուսական մշակույթի ռուսական կենտրոն»-ի տնօրեն Մարկ Կալինինը:  

«Ռուս–Հայկական երիտասարդական միասնություն» հասարակական կազմակերպության ղեկավար Գոհար Ղումաշյանի խոսքով, ակցիայի շրջանակներում սիրիահայ ընտնաիքներին կտրամադրվի հումանիտար օգնություն, ինչպես նաև աջակցություն` հասարակության շրջանում ինտեգրվելու համար:

«Սիրահայ փախստականներին կօգնենք կենցաղային հարցերում, կտրամադրվի հագուստ, սնունդ, դեղամիջոցներ: Դրանից բացի, նախատեսում ենք օգնել բնակարանային վարձավճարների հարցում»,-ասել է Գոհար Ղումաշյանը:

Երկու ամսվա ընթացում անցկացվել է Սիրիայի փախստականների սոցիալական կարգավիճակի մոնիտորինգ:  Արդյունքում` ընտրվել են մի քանի տասնյակ ընտանիքներ, որոնք գտնվում են կարիքի մեջ: Առաջին փուլում օգնություն է տրամադրվելու 44 ընտանիքի, որոնք ապրում են Երևանում:

Ակցիան կրելու է շարունակական բնույթ, և անցկացվելու է երկու ամիսը մեկ: 2016 թվականին Հայաստանում պաշտոնապես հաշվարկվում է Սիրիայից եկած շուրջ 20 հազար փախստական: