Մասիսում գնացքի և մեքենայի բախումից տուժածի վիճակը ծանր է
ՀԱՍԱՐԱԿՈՒԹՅՈՒՆՀՀ արտակարգ իրավիճակների նախարարությունում մարտի 17-ին` ժամը 23.03-ին, տեղեկատվություն է ստացվել, որ Արարատի մարզի Մասիս քաղաքի Գործարանային փողոցի մոտակայքում բախվել են գնացքը և մարդատար ավտոմեքենան, կա տուժած, անհրաժեշտ է փրկարարների օգնությունը: Ինչպես տեղեկացրին ՀՀ արտակարգ իրավիճակների նախարարությունից, կանչի վայր են մեկնել մեկ մարտական հաշվարկ և ՄՓՎ օպերատիվ խումբը:
Դեռևս չպարզված հանգամանքներում բախվել են «Վազ-2106» մակնիշի 05 ՕՕ 481 պետհամարանիշի ավտոմեքենան (վարորդ՝ Է. Զ., ծնված 1989թ.) և ВЛ10У631 էլեկտրագնացքը, ինչի հետևանքով տուժած Է. Զ.-ը մինչև փրկարարների դեպքի վայր հասնելը հոսպիտալացվել է Մասիսի ԲԿ, որտեղ բժիշկները տուժածի առողջական վիճակը գնահատել են ծանր:
Հրշեջ-փրկարարները հոսանքազրկել են ավտոմեքենան, փակել գազի փականը և ավտոմեքենան հեռացրել են երկաթգծից:



