Կարմիրգյուղում նոր կոմբայնի շնորհիվ կավելանան հացահատիկի ցանքերը

 ՀՀ գյուղատնտեսության եւ տարածքային կառավարման և զարգացման նախարարությունների, ինչպես նաեւ Գեղարքունիքի մարզպետարանի աջակցությամբ, վերջերս Կարմիրգյուղ համայնքը ձեռք է բերել հացահատիկահավաք նոր կոմբայն, ինչի շնորհիվ համայնքի տնտեսություններում ակնկալվում է հացահատիկային մշակաբույսերի ցանքատարածությունների ավելացում:

Ինչպես «Արմենպրես»-ին տեղեկացրեց Կարմիրգյուղի գյուղապետարանի գլխավոր հաշվապահ Աշոտ Ջզմաչյանը, ձեռք բերված նոր տեխնիկայի շնորհիվ համայնքում ոչ միայն կավելանան մշակովի հողատարածքները, այլ նաեւ ավելի դյուրին կկազմակերպվեն  հացահատիկի բերքահավաքի աշխատանքները: «Նոր կոմբայնի պահանջը համայնքում խիստ էր զգացվում, քանի որ կեսդարյա վաղեմություն ունեցող կոմբայնները հիմնականում անսարք են եւ բերքահավաքի եռուն օրերին չեն հասցնում լիարժեքորեն ու որակյալ բերքահավաք իրականացնել:

Նոր կոմբայնի շնորհիվ այս տարի վերջապես գյուղացին տուն կտանի ոչ թե ցորենի ու գարու ջարդված, անմաքուր, այլ ամբողջությամբ զտված ու առողջ հատիկներ: 600  հեկտար հացահատիկային մշակաբույսերի ցանք ունենք, որը ժամանակին հնձելու եւ հավաքելու կարիք ունեինք: Համոզված եմ, որ տնտեսություններն այսուհետ որոշակիորեն կավելացնեն հացահատիկի ցանքերը: Նոր կոմբայնը տնտեսություններին ծառայություններ կմատուցի  համեմատաբար էժան գներով»,-հավաստեց Աշոտ Ջզմաչյանը:Կոմբայնի արժեքը 27 միլիոն դրամ է: Այն ձեռք է բերվել լիզինգային պայմանագրով եւ 10 տարվա մարմ ան ժամկետով: Կարմիրգյուղում այս տարի կմեկնարկի «Գյուղատնտեսական ռեսուրսների կառավարման եւ մրցունակության ծրագիրը», որի շրջանակներում համայնքը կհամալրվի նոր գյուղտեխիկայով:»

Անհնար է այսօրվա գյուղատնտեսությունը պատկերացնել առանց վարող, ցանող, հնձող, հավաքող տեխնիկաների: Գյուղում եղած տեխնիկական միջոցներն արդեն հնամաշ են, դուրսգրման ենթակա: Առաջիկա տարիներին պետք է հասնենք նրան, որ ունենանք բոլորովին նորացված գյուղմեքենաների ու մեխանիզմների պարկ»-նշեց Աշոտ Ջզմաչյանը:

Խոսրով Խլղաթյան