Գեղարքունիքում նախորդ տարի բուհ է ընդունվել ավարտական դասարանների աշակերտների 28,5 տոկոսը

Գեղարքունիքի մարզում 2015 թվականին հանրակրթական հաստատությունների 2373 շրջանավարտներից 808-ը դիմել են  Հայաստանի 13 բուհեր, նրանցից ուսանող է դարձել 677-ը:

Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի ԿՄՍ վարչության պետի տեղակալ Սաշա Բավեյանը, Գեղարքունիքի շրջանավարտների 28,5 տոկոսն անցած տարի դարձել է բուհի ուսանող: Գեղարքունիքի մարզի շրջանավարտների մեծ մասը նախորդ տարի նախապատվությունը տվել է Երեւանի պետական համալսարանում բարձրագույն կրթություն ձեռք բերելուն: Այստեղ դիմել է  265 սովորող, որոնցից 223-ը դարձել են տարբեր ֆակուլտետների ուսանողներ: Երկրորդ տեղում է Երեւանի Խ. Աբովյանի անվան պետական մանկավարժական համալսարանը , որտեղ Գեղարքունիքի 135 դիմորդից ընդունվել է 110-ը: 93 շրջանավարտներ որոշել են մասնագիտություն ստանալ Գավառի պետական համալսարանում, որոնցից 78-ը կարողացել են հաղթահարել ընդունելության քննությունների շեմը: Հայաստանի պետական տնտեսագիտական համալսարան դիմած 77 հոգուց ընդունվել են 54-ը, Մ. Հերացու անվան պետական բժշկական ինստիտուտ դիմած 74 հոգուց՝ 65-ը, Հայաստանի ագրարային համալսարան դիմած 49 հոգուց՝ 48-ը, Հայաստանի ազգային պոլիտեխնիկական համալսարան դիմած 42 հոգուց՝ 37-ը, Երեւանի Վ. Բրյուսովի անվան լեզվագիտական համալսարան դիմած 32 հոգուց՝ 27-ը, Ճարտարաետության եւ շինարարության Հայաստանի ազգային համալսարան դիմած  32 հոգուց՝ 31-ը: Երեանի «Հայբուսակ» համալսարան դիմել են 6-ը, որոնցից մեկին է միայն հաջողվել ընդունվել: Մեկական ուսանողներ որոշել են մասնագիտանալ Սլավոնական եւ Վանաձորի պետական համալսարաններում:

Խոսրով Խլղաթյան