Ասիական ոճը՝ ինտերիերում. Բնական ներդաշնակություն ու ինքնաբավություն

Ասիական ոճն իրենից ներկայացնում է Չինաստանի, Ճապոնիայի, Թաիլանդի, Հնդկաստանի, Սինգապուրի, Վիետնամի, Կորեայի դեկորատիվ ավանդույթների համադրություն,-գրում է Past.am-ը: Ասիական երկրների մշակույթը երկար տարիներ ձևավորվել է առանց որևէ արտաքին միջամտության, հենց այդ պատճառով էլ այդ ոճն այդքան ինքնաբավ է ու անկրկնելի:

Ասիական դիզայնում ամենատարածված ուղղություններն են ճապոնական ու չինական ոճերը: Ճապոնական ինտերիերի համար բնորոշ է գունային գամման՝ բնական երանգներով, որտեղ մեծ տեղ է գրավում շագանակագույնը, ինչպես նաև սպիտակը, մոխրագույնը, կանաչն ու դեղինը:

Չինաստանում, հակառակը, սիրում են վառ համադրություններ: Համաձայն ավանդույթի՝ կարմիր գույնը հաջողություն է բերում տուն ու հարստություն:

Անկասկած, կան ինտերիերի ձևավորման որոշ ընդհանուր գծեր, որ բնորոշ են Ասիայի երկրների մեծ մասին՝ ազատ տարածություն, բնությանը մոտ լինելը, բնական լույսի մեծ քանակությունն ու մինիմալիզմը:

Ասիական ոճում ամենահիմնական նյութերից մեկը բնական փայտն է, որը հաճախ ներկում են սև գույնով ու պատում լաքով:

Կահույքը ասիական ոճում պետք է շատ չլինի, քանի որ Արևելքում ընդունված է նստել գետնին: Աթոռները գրեթե բացակայում են, իսկ սեղաններն ու բազմոցները ցածր են:
Կահույքը կարող է պատրաստվել մուգ փայտից, բամբուկից ու ռոտանգից:

Ասիական երկրներում սովորաբար տեղադրում են ցածր ցածր մահճակալ կամ ներքնակը դնում են հատակին: Ննջարանում ընդունված է դնել միայն ամենաանհրաժեշտ կահույքը:

Չինաստանում ու Ճապոնիայում մինչ տուն մտնելը ընդունված է հանել կոշիկները ու սենյակներում ոտաբոբիկ քայլել: