ԴԱՀԿ ծառայության աշխատակիցը պաշտոնեական անփութություն է թույլ տվել

Հատուկ քննչական ծառայությունը քրեական գործ է հարուցել դատական ակտերի հարկադիր կատարողի կողմից առերեւույթ պաշտոնեական անփութություն կատարելու դեպքի առթիվ:

Ըստ ՀՔԾ լրատվական ծառայության հաղորդած տվյալների՝ քաղաքացի Գրիգոր Ա.-ն, նախազգուշացված լինելով սուտ մատնություն կատարելու համար նախատեսված քրեական պատասխանատվության մասին, հայտնել է, որ ՀՀ արդարադատության նախարարության դատական ակտերի հարկադիր կատարումն ապահովող ծառայության Արաբկիր եւ Քանաքեռ-Զեյթուն վարչական շրջանների հարկադիր կատարող կողմն առերեւույթ պաշտոնեական անփութություն է կատարել:

Մասնավորապես, քաղաքացի Գրիգոր Ա.-ն հաղորդում է տվել այն մասին, որ Արդարադատության նախարարության դատական ակտերի հարկադիր կատարումն ապահովող ծառայության Արաբկիր եւ Քանաքեռ-Զեյթուն վարչական շրջանների հարկադիր կատարողը 2015-ի Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի կողմից պատասխանողներ Կարեն Չ.-ից, Հուսիկ Չ.-ից եւ Հայկանուշ Ս.-ից հօգուտ իրեն 31 միլիոն դրամ բռնագանձելու վերաբերյալ տված կատարողական թերթը ստանալուց հետո, կատարողական վարույթի ընթացքում իր ծառայողական պարտականությունները չկատարելու արդյունքում միջոցներ չի ձեռնարկել պատասխանողներին պատկանող այլ գույքի՝ բնակարանի վրա արգելանք դնելու ուղղությամբ, ինչի հետեւանքով վերջիններս 2015թ. դեկտեմբերին օտարել են բնակարանը՝ իրեն պատճառելով առանձնապես խոշոր չափերով գույքային վնաս:

Քաղաքացի Գրիգոր Ա.-ի հաղորդման հիման վրա ՀՀ արդարադատության նախարարության դատական ակտերի հարկադիր կատարումն ապահովող ծառայության Արաբկիր եւ Քանաքեռ-Զեյթուն վարչական շրջանների հարկադիր կատարողի կողմից առերեւույթ պաշտոնեական անփութություն կատարելու դեպքի առթիվ Հատուկ քննչական ծառայությունում Քրեական օրենսգրքի 315-րդ հոդվածի առաջին մասով քրեական գործ է հարուցվել:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: