Հոգեմետ դեղով անվճար ապահովման խնդրին լուծում կտրվի գործող օրենսդրության շրջանակում

Հոգեկան առողջության հիմնարկների, Դեղերի և բժշկական տեխնոլոգիաների փորձագիտական կենտրոնի ղեկավարների, առաջատար մասնագետների, ֆինանսիստների, դեղատնտեսագետի  մասնակցությամբ ՀՀ առողջապահության նախարար Արմեն Մուրադյանի մոտ  քննարկվել են 2014թ. «Ավան հոգեկան առողջության կենտրոն»-ում հիվանդների շրջանում «Օլանզապին-Զիպրեքսա» և  «Օլանզապին-Զոլաքսա» դեղամիջոցների հնարավոր կողմնակի ազդեց ությունների ռետրոսպեկտիվ գնահատման նպատակով կատարված հետազոտության արդյունքները։ «Զիպրեքսա» և «Զոլաքսա» դեղն ընդունած մոտ 300 հիվանդի ներգրավմամբ երկու առանձին խմբում  կատարվել են  ուսումնասիրություններ` հաշվի առնելով բուժման ընթացքում կողմնակի ազդեցությունների, հոսպիտալացման և խնամքի  ցուցանիշները։ Նշվել է, որ արդյունքները խոսում են Զիպրեքսայի արդյունավետության մասին։ 

ՀՀ ԱՆ Ակադեմիկոս Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոնում գրանցվել է «Զոլաքսա» դեղի կողմնակի ազդեցության 43 դեպք։  

Ինչպես «Արմենպրես»-ին տեղեկացրին ՀՀ առողջապահության նախարարության հասարակայնության հետ կապերի բաժնից, այս ամենը վկայակոչելով` հոգեկան առողջության խնդիրներ ունեցող անձանց հարազատները տարբեր ատյաններում իրենց հիվանդներին անվճար «Զիպրեքսա» հոգեմետ դեղով ապահովելու հարց են բարձրացնում` պնդելով, որ այն առավել արդյունավետ և որակով է:

Մասնագետները նաև շեշտադրել են, որ հոգեկան առողջության խնդիրներ ունեցողների, քան այլ հիվանդների մոտ պլացեբո ազեցությունն անհամեմատ ավելի բարձր է։

Հնչել են խնդրին լուծում տալու տարբեր առաջարկներ։ Նախարարը, կարևորելով խնդրի սոցիալական նշանակությունը, հանձնարարել է համադրել առկա փաստերը, խորհրդակցել հոգեբույժների լայն խմբի հետ  և առաջարկություններ ներկայացնել գործող օրենսդրության շրջանակներում խնդրի լուծման ուղղությամբ։

Քննարկվել է նաև խնդրի հեռահար լուծման նպատակով բանակցությունների արդյունքում «Զիպրեքսա» դեղը անմիջապես արտադրողից ձեռք բերելու հարցը։