Վահան Բաբայանը կրկին խուսափեց պատասխանել, թե ինչու է փոխել իր կարծիքը (տեսանյութ)

Երբ փետրվարի 29-ին Ազգային ժողովի էթիկայի հանձնաժողովը փակ նիստում քննարկել է ՀՀԿ-ական պատգամավոր, երգչուհի Շուշան Պետրոսյանի դեմ ներկայացված դիմումի քննությունը և արձանագրել, որ երգչուհին չի խախտել էթիկան, պարզ դարձավ, որ այդ որոշմանը հանձնաժողովի բոլոր անդամները կողմ են քվեարկել, իսկ ՕԵԿ-ական Հովհաննես Մարգարյանը՝ ձեռնպահ:

Սակայն պետք է հիշել, որ համացանցում օգտատիրոջը վիրավորած Շուշան Պետրոսյանի վարքի վերաբերյալ հստակ մոտեցում ուներ էթիկայի հանձնաժողովի արդեն նախկին նախագահ Վահան Բաբայանը, ով այդ պաշտոնում գտնվելու ժամանակ բազմիս հայտարարել է, որ պետական պաշտոնյան իրավունք չունի նման կերպ խոսել:

Սակայն այն բանից հետո, երբ նախագահությունը ստանձնեց ՀՀԿ-ական Խոսրով Հարությունյանը, Բաբայանը մտափոխվեց և նիստի ժամանակ նույնպես կողմ քվեարկեց հանձնաժողովի որոշմանը: Այդ նիստից հետո Բաբայանն արագ հեռացավ՝ խուսափելով լրագրողների հարցական հայացքներից:

Այսօր էլ, ինչպես նախորդ նիստին, Բաբայանը նույնպես խուսափեց լրագրողներին մեկնաբանել, թե ինչով է պայմանավորված իր քվեարկության և նախքան այդ հնչած հայտարարությունների տարբերությունը: «Հանձնաժողովը որոշում է կայացրել, իմ դիրքորոշումը դրա հետ կապ չունի»,- ասաց Բաբայանը:

Past.am-ի հարցին, թե պատգամավորը կարող էր դեմ կամ ձեռնպահ քվեարկել՝ պատգամավորը չպատասխանեց, այլ խոստացավ առաջիկայում մեկնաբանել:

Լիլիթ Լալայան

Մանրամասները՝ տեսանյութում.