ԱՄՆ-ի զինված ուժերը ցանկանում են իրենց գլխավոր հրամանատար տեսնել Թրամփին կամ Սանդերսին

 ԱՄՆ-ի զինծառայողները ցանկանում են երկրի գլխավոր հրամանատար տեսնել միլիարդատեր Դոնալդ Թրամփին կամ սենատոր Բեռնի Սանդերսին: Այդ մասին, մարտի 14-ին հայտնել Է Military Times մասնագիտացված հրատարակությունը՝ ամփոփելով ԱՄՆ-ի զինուժերում անցկացված հարցումների արդյունքները:

Թերթի ներկայացուցիչները հետաքրքրվել են, թե զինծառայողները որ թեկնածուի օգտին են պատրաստ տալ իրենց ձայնը, եթե նախագահական ընտրությունները կայանան արդեն հաջորդ օրը:

«Հանրապետականների ֆավորիտը համարվող Թրամփը առավել մեծ ժողովրդականություն Է վայելել զինծառայողների շրջանում՝ հավաքելով ձայների շուրջ 27 տոկոսը, երկրորդ տեղը գրավել Է դեմոկրատ, Վերմոնտի նահանգից սենատոր Բեռնի Սանդերսը՝ 22 տոկոսով»,-ասված Է հոդվածում:

Հրատարակությունը նշել Է, որ այս երկու թեկնածուների ելույթները «արձագանք են գտնում զինվորական համազգեստով մարդկանց շրջանում»: Հարցման արդյունքներով՝ երրորդ տեղն զբաղեցրել Է հանրապետական եւ Տեխասի նահանգից սենատոր Թեդ Քրուզը (16,7 տոկոս), որին հաջորդում Է դեմոկրատ, ԱՄՆ-ի նախկին պետքարտուղար Հիլարի Քլինթոնը (11,7 տոկոս): Մնացած թեկնածուները 10 տոկոսից պակաս ձայներ են հավաքել:

Մարտի 15-ին նախնական ընտրություններ են տեղի ունենալու ԱՄՆ-ի հինգ նահանգներում՝ Ֆլորիդայում, Իլինոյսում, Միսուրիում, Հյուսիսային Կարոլինայում եւ Օհայոյում, իսկ ԱՄՆ-ի հետ ազատ ասոցացված Հյուսիսային Մարիանյան կղզիներում  Հանրապետական կուսակցության անդամները կանցկացնեն կուսակցական ակտիվի ժողովներ (կոկուսներ):

Ընտրությունների ընթացքում որոշվելու է, թե Սպիտակ տան համար պայքարի մասնակիցներից ում օգտին իրենց ձայնը կտան այդ նահանգների պատվիրակները Հանրապետական եւ Դեմոկրատական կուսակցությունների ազգային համագումարներում, որտեղ հայտարարվելու են ԱՄՆ-ի նախագահի պաշտոնական թեկնածուները նոյեմբերի 8-ի ընտրություններում:

Հանրապետական հավակնորդները՝ Դոնալդ Թրամփը, Տեխասից սենատոր Թեդ Քրուզը, Ֆլորիդայից սենատոր Մարկո Ռուբիոն եւ Օհայոյի նահանգապետ Ջոն Քեյսիկը այդ օրը կպայքարեն ազգային համագումարի 367 պատվիրակների ձայների, իսկ դեմոկրատ հավակնորդները՝ ԱՄՆ-ի նախկին պետքարտուղար Հիլարի Քլինթոնը եւ Վերմոնտից սենատոր Բեռնի Սանդերսը՝ 792 պատվիրակների ձայների համար: «Այս երեքշաբթի քվեարկության արդյունքները կորոշեն նախագահական ընտրարշավի հետագա ողջ դինամիկան ինչպես դեմոկրատների, այնպես էլ հանրապետականների համար»,- նշել է CNN հեռուստաընկերությունը, հաղորդել է ՏԱՍՍ-ը: