Բուխարեստում ամփոփել են Սևծովյան ցանցային ծրագրի արդյունքները

Բուխարեստի «Շերաթոն» հյուրանոցում մարտի 10-ին տեղի ունեցավ Սևծովյան ցանցային ծրագրի/Black Sea Network Project ամփոփիչ միջոցառումը, որը կազմակերպել էր «Արկածային դիվանագիտություն»/Adventure Diplomacy հասարակական կազմակերպությունը:

Վերջինիս նախաձեռնությամբ անցյալ տարվա հոկտեմբերին Սևծովյան ավազանի ութ երկրների՝ Ռումինիայի, Ռուսաստանի, Մոլդովայի, Թուրքիայի, Վրաստանի, Հայաստանի, Ադրբեջանի, Ուկրաինայի երիտասարդներ համատեղ արշավ էին իրականացրել Վրաստանի տարածքում գտնվող 5033 մ բարձրությամբ Կազբեկ լեռնագագաթ՝ նպատակ ունենալով ընդհանուր նպատակի սահմանմամբ և դժվարությունների համատեղ հաղթահարմամբ անմիջական կապեր ստեղծել այն ժողովուրդների ներկայացուցիչների միջև, ովքեր բնակվում են հակամարտություններով ծվատված ընդարձակ տարածաշրջանում:

Արկածային պահերով լեցուն արշավի կազմակերպիչներն ու մասնակիցներն այդպիսով նաև ստանձնել էին ժողովրդական դիվանագիտության միջոցներով հակամարտող երկրների միջև հանդուրժողականության, խաղաղ համակեցության, այլատյացությունը մերժելու գաղափարների տարածման առաքելությունը: Ծրագրի հայաստանյան մասնակիցներն էին Տարոն Պետրոսյանը և Հրաչուհի Գալստյանը:

Ամփոփիչ միջոցառման ժամանակ ելույթներ ունեցան ծրագրի նախաձեռնողներն ու մասնակիցները, Բուխարեստում հավատարմագրված Սևծովյան ավազանի երկրների դեսպանությունների ներկայացուցիչները, ցուցադրվեցին լուսանկարներ և տեսանյութեր:

Բուխարեստում ՀՀ դեսպանությունը ներկայացնում էր դեսպանորդ Ա. Գրիգորյանը, որը համառոտ խոսքով դիմեց ներկաներին՝ արժևորելով ծրագրի մասնակիցների ստանձնած կարևոր հանձնառությունը: