Մերկելի կուսակցությունն ընտրությունները տանուլ է տվել դաշնային երեք երկրամասերից երկուսում

Գերմանիայի կանցլեր Անգելա Մերկելի Քրիստոնեա-դեմոկրատական միությունը (ՔԴՄ) տարածաշրջանային ընտրությունները տանուլ է տվել դաշնային երեք երկրամասերից երկուսում, որտեղ մարտի 13-ին ընտրություններ են կայացել, տեղեկացնում է«Արմենպրես»-ը՝ հղում անելով Deutsche Welle-ին: Ընդ որում բոլոր երեք երկրամասերի խորհրդարաններ են անցել աջ եվրասկեպտիկների «Այլընտրանք Գերմանիայի համար» (ԱԳՀ) կուսակցությունը:

Ըստ նախնական տվյալների՝ Բադեն-Վյուրտենբերգում կառավարող «կանաչները» ստանում են ձայների 30 տոկոսը, ՔԴՄ-ն՝ 27 տոկոսը: ԱԳՀ-ն երրորդ տեղն է զբաղեցրել 15,1 տոկոս ձայներով: Ռեյնլանդ-Պֆալցի երկրամասում ընտրությունները շահել է Գերմանիայի Սոցիալ-դեմոկրատական կուսակցությունը՝ 36,2 տոկոս ձայներով, ՔԴՄ-ն հավաքել է ձայների 31,8 տոկոսը, իսկ ԱԳՀ-ն՝ 12,6 տոկոսը:

Մերկելի կուսակցությունը հաղթանակ է տարել միայն Սաքսոնիա-Անհալտում, որտեղ այն հավաքել է ընտրողների ձայների 28,8 տոկոսը: 24,14 տոկոսով երկրորդ տեղն զբաղեցրել է ԱԳՀ-ն, երրորդ տեղում Ձախ կուսակցությունն է՝ 16,2 տոկոս ձայներով:

Տարեսկզբին գերմանացի սոցիոլոգները հայտարարել են ՔԴՄ/ՔՍՄ աջ կենտրոնամետ դաշինքի վարկանիշի ռեկորդային անկման մասին: Ընդ որում հարցումները վկայում են աջ եվրասկեպտիկների՝ «Այլընտրանք Գերմանիայի համար» կուսակցության ազդեցության աճի մասին: Դրա աջակցության մակարդակն այժմ կազմում է 12,5 տոկոս այն դեպքում, երբ 2013 թվականին ԱԳՀ-ն հավաքել էր ձայների ընդամենը 4,7 տոկոսը եւ նույնիսկ չէր անցել խորհրդարան: