Սոցիալական վիճակն այնքան ծանր է, որ մարզերի բնակիչները միշտ չէ, որ կարող են գալ մայրաքաղաք՝ համերգներ նայելու. Ռուբեն Սասունցի

Life.panorama.am-ը գրում է.

Ռուբեն Սասունցին, Գոհար Հովհաննիսյանն ու Աղասի Իսպիրյանը կրկին սկսում են համերգային շրջագայությունը Հայաստանի մարզերում, այս անգամ նվիրված կանանց մեկամսյակին: Առաջին համերգը կկայանա Շիրակի մարզում՝ ապրիլի 1-ին Սպիտակում, ապրիլի 3-ին` Գյումրիում. «Շուտով մեր հերթական «Սասնա էրգիր» համերգ-ներկայացմամբ հանդես կգանք մարզերում բնակվող մեր հայրենակիցների համար»,-Life.panorama.am-ին հայտնեց Ռուբեն Սասունցին, ով ապրիլի 13-ին մենահամերգով հանդես կգա Էջմիածնում, իսկ նրան կընկերակցեն «Տարոնցիներ» ազգագրական երգի եւ պարի համույթը:

Ռուբեն Սասունցին շատ է կարեւորում մարզային համերգները.

«Մարզերում համերգ կազմակերպելը այնքան էլ մեծ ֆինանասական հարցերի հետ կապված չեն, բայց փոխարենը եւ մենք, եւ տեղի բնակչությունը մեծ հաճույք ենք ստանում: Մեզ համար պարտքի նման մի բան է մեր ազգային երաժշտությունը ներկայացնել մարզերում ապրող  մեր հայրենակիցների համար, քանի որ այսօր սոցիալական վիճակն այնքան ծանր է, որ մարզերի բնակիչները միշտ չէ, որ կարող են գալ մայրաքաղաք՝ համերգներ նայելու: Մենք ամեն ինչ անում ենք, որպեսզի առաջին իսկ հնարավորության դեպքում համերգներով հանդես գանք Հայաստանի տարբեր շրջաններում»,-նշեց երգիչն ու հավելեց, որ այդ համերգների տոմսերի արժեքը չնչին գումարներ են կազմում:

Ռուբեն Սասունցին նկատեց, որ տարբերություն չկա աշխարհի որ ծայրում են համերգով հանդես գալիս, նրանց համար հանդիսատեսը նույնն  է.

 «Անկախ նրանից հայը աշխարհի ո՞ր երկրում է ապրում, ազգագրական երաժշտության հանդեպ նրա սերը նույն  է, կապ չունի մենք կերգենք Ավստրալիայում, թե Սպիտակում, մեզ համար հանդիսատեսի ջերմությունը նույնն է»,- նշեց երգիչն ու նկատեց, որ այս տարի վերջապես կկայանա երեւանյան մենահամերգը:

Ռուբեն Սասունցին իր արվեստի երկրպագուներին այս գարնան համար եւս մեկ անակնկալ է պատրաստում.

«Գեւորգ Չաուշի մասին նոր երգ եմ ձայնագրվում, որի հիման վրա մոտ օրերս տեսահոլովակ կնկարահանենք: Այս անգամ կաշխատեմ ռեժիսոր Կարեն Զադիրյանի հետ: Տեսահոլովակս հավանաբար ապրիլին պատրաստ կլինի»,- ավելացրեց ազգագրական երգերի կատարող Ռուբեն Սասունցին:

Հեղինակ՝ Անուշիկ Մելքոնյան