Ադրբեջանում աճում է վնասով աշխատող բանկերի թիվը

Ադրբեջանում գործող 37 բանկերից 16-ը չեն հրապարակել 2015 թվականի համար ֆինանսական զեկույցը, հաշվետու եղած 21 բանկերից 7-ն էլ աշխատել են վնասով:

Այս մասին, հայտնում է «Թուրան» լրատվական գործակալությունը` նշելով, թե փորձագետները գտնում են, որ 2005 թվականի համար զեկույցի հարցում չշտապող բանկերն, ամենայն հավանականությամբ, անցած տարին փակել են վնասով եւ հարմար չեն համարում հրապարակել այդ մասին:

«Այդ պատճառով, կարելի է ենթադրել, որ 37 բանկերից 21-ը 2015 թվականն ավարտել են վնասով, ինչը գլխավորապես կապված է անցայլ տարի ադրբեջանական ազգային արժույթի` մանաթի փոխարժեքի երկու անգամ ընկնելու հետ», -հաղորդում է «Թուրան»-ը:

Գործակալության թղթակցի հետ զրույցում տնտեսագետ-փորձագետ Սամիր Ալիեւը հայտնել է, որ 2016 թվականին Ադրբեջանում վնասով աշխատող բանկերի թիվը կաճի:

Նրա կարծիքով` բանկերին օգուտով աշխատելու հնարավորություն չի ընձեռի երկրում վարկավորման թուլացումը  եւ խնդրահարույց վարկերի զուգահեռ աճը:

«Մանաթի արժեզրկումը դժվարացրել է դոլարային վարկերի վերադարձը: 2016 թվականին բանկերի հիմնական խնդիրը կդառնան ժամկետանց վարկերը: Նման վարկերի ծավալը կաճի: Մանաթի շարունակվող արժեզրկումը կուժեղացնի այդ խնդիրը: Այն ինչ-որ կերպ լուծել հնարավոր կլինի միայն կառավարության օժանդակությամբ: Հակառակ դեպքում, բանկերի եկամուտները խիստ կկրճատվեն, եւ նրանց մոտ ավանդատուների առաջ պարտավորությունների հետ խնդիրներ կծագեն», -ասել է Սամիր Ալիեւը:

Նշենք, որ 2014 թվականի օգոստոսից մանաթի փոխարժեքը կայուն պահելու վրա Ադրբեջանի կենտրոնական բանկը ծախսել է իր 15,193 մլրդ դոլար արտարժույթի պահուստի 10,176 մլրդ դոլար մասը կամ 67 տոկոսը (minval.az, marja.az):

Ադրբեջանը 2015 թվականին կորցրել է իր արտարժույթի պահուստների 24,1 տոկոսը (12 մլրդ 271,6 մլն դոլար): Նավթի արտահանումից Ադրբեջանի ընդհանուր կորուստը 2015 թվականին կազմել է 10 մլրդ դոլարից ավելի:

Ադրբեջանի բանկերի ակտիվները փետրվարին 1,1 մլրդ մանաթով նվազել են. բանկերը մեկ տարում կորցրել են 700 մլն մանաթ:

2016 թվականի մարտի 1-ից Ադրբեջանում արտարժույթով ավանդների ապահովագրության վերին սահմանը 12 տոկոսից իջեցվել է 3 տոկոսի:

2015 թվականի դեկտեմբերի 21-ին Ադրբեջանի կենտրոնական բանկը որոշում է ընդունել անցնել մանաթի լողացող փոխարժեքի, ինչի արդյունքում ԱՄՆ-ի դոլարի եւ եվրոյի փոխարժեքը մանաթի նկատմամբ գրեթե երկու անգամ աճել է: Որոշ տվյալներով` Բաքվի «սեւ շուկայում» ամերիկյան մեկ դոլարը վաճառվում է արդեն 3-4 մանաթով:

«Թուրան»-ը հայտնում է, որ Ադրբեջանում այս տարվա ընթացքում արդեն 8 բանկ փակվել է:

Ադրբեջանի բանկային հատվածը կրախի է ենթարկվել: Անցյալ տարվա ընթացքում ազգային արժույթի` մանաթի 100 տոկոսից ավելի արժեզրկվելու, բնակչության կողմից դոլարով վերցրած վարկերը վերադարձնելու գործում ծագած դժվարություններն ավելի են մեծացրել խնդրահարույց վարկերի ծավալը: Միայն այս տարվա ընթացքում Ադրբեջանում չեղարկվել է Texnikabank, Bank of Azerbaijan, NBCBank, Qafqaz İnkisaf Banki, Atrabank, Gancabank եւ United Credit Bank բանկերի գործունեության թույլտվությունները: Փակվել են նաեւ «Դեմիրբանկ»-ի 4 բաժանմունքները: Ադրբեջանում բանկերի փակվելու այդ գործընթացը շարունակվում է:

Նավթի համաշխարհային գների անկումն սկսվելուց ի վեր Ադրբեջանում մինչ այժմ մոտ 18 բանկ փակվել է: Haqqin.az կայքն ավելի վաղ մեջբերել էր սոցցանցերում հայտնված ադրբեջանական բանկերից մեկի` Atlant Bank-ի` բանջարեղենի եւ մրգերի վաճառակետի վերածված լուսանկարը, որը հանդիսանում է  Ադրբեջանի բանկային համակարգի կրախի ակնառու օրինակ: