Հայաստանում տղա ունենալու մոլուցքը շատ մեծ է. Արմեն Գալստյան

Հայաստանում տղա ունենալու մոլուցքը շատ մեծ է: Այս մասին «Պտղի սեռի խտրական ընտրության դեմ պայքար» ծրագրի խորհրդատվական հանձնաժողովի նիստի  ընթացքում լրագրողների հետ զրույցում նշեց «Մարդկային զարգացման միջազգային կենտրոն» հասարակական կազմակերպության (ՄԶՄԿ) գործադիր տնօրեն Արմեն Գալստյանը:

«Սեռով պայմանավորված հղիության ընդհատումների հարցը դարձավ օրհասական այն ժամանակ, երբ ՄԱԿ-ի կողմից 2011-ին հրապարակվեց վերլուծություն, ըստ որի՝ աղջիկ-տղա հարաբերակցությունը կազմում է 100 աղջկան 114 տղա: Սա խնդիր է: Բնական շեղումը միջինը 105-106 է: 2050-60-ական թթ. մեր երկրում չէր ծնվի 90 հազար կին, աղջիկ, որոնք հետագայում պետք է դառնային մայրեր, ունենային երեխաներ»,- «Արմենպրես»-ի փոխանցմամբ` նշեց Արմեն Գալստյանը:

Նա շեշտեց, որ այս հետազոտությունից հետո ամենաբարձր մակարդակով խնդիրը բարձրաձայնվեց, համապատասխան հանձնարարականներ տրվեցին, և կառավարությունը ուշադրություն դարձրեց խնդրին, մշակվեցին տարբեր ծրագրեր:

«Մարդկային զարգացման միջազգային կենտրոն» հասարակական կազմակերպությունը (ՄԶՄԿ) «Սթիթչինգ Սեյվ դը Չիլդրեն Նեդերլանդ» կազմակերպության («Սեյվ դը Չիլդրեն Նիդերլանդներ»), «Արմավիրի զարգացման կենտրոն» ՀԿ-ի (ԱԶԿ), «Մարտունու կանանց համայնքային խորհուրդ» ՀԿ-ի (ՄԿՀԽ) և «Սեյվ դը Չիլդրեն Ինթերնեյշնըլ» կազմակերպության (ՍԴՉ) հետ համագործակցությամբ և Եվրոպական հանձնաժողովի ֆինանսական օժանդակությամբ շարունակում են «Պտղի սեռի խտրական ընտրության դեմ պայքար» ծրագրի իրականացումը: