Ստամբուլում հատուկ գործողություն է անցկացվել «հեղափոխականների» դեմ

Ստամբուլի ոստիկանության ահաբեկչության դեմ պայքարի բաժնի աշխատակիցները Բեյօղլու շրջանի Օքմեյդան վայրում  հատուկ գործողություն են անցկացրել «Հեղափոխական ժողովրդա-ազատագրական կուսակցություն-ճակատ» (DHKP-C) կազմակերպության երիտասարդական դաշինքի թուրքական կենտրոնում, որի ժամանակ ձերբակալվել են կազմակերպության 6 անդամներ, այդ թվում` 3 կին:

Այս մասին, հայտնում է «Անատոլու» լրատվական գործակալությունը` նշելով, որ ձերբակալվածները «ծրագրում էին ահաբեկչական գործողություններ իրականացնել Ստամբուլի մի շարք շրջաններում»:

DHKP-C-ն Թուրքիայում ահաբեկչական կազմակերպություն է համարվում:

Մարտի 3-ին DHKP-C-ի անդամ երկու կին Ստամբուլի Բայրամփաշա շրջանում նռնակ են նետել ոստիկանության բաժանմունքի շենքի վրա: Ոստիկանության աշխատակիցները հետապնդել եւ սպանել են նրանց:

Փետրվարի 16-ին Թուրքիայի հարավ-արեւելյան քրդաբնակ Ուրֆայի նահանգում իրավապահները ձերբակալել են DHKP-C-ի անդամ պոտենցիալ ահաբեկիչ-մահապարտ Դիլեք Քային:

Այդ կազմակերպությունը պատասխանատվություն է կրում 2015 թվականի մայիսին Հաթայի (Անտիոք) նահանգի Ռեյհանլը քաղաքում իրագործված ահաբեկչական գործողությունների համար, որոնց արդյունքում զոհվել են 46 եւ վիրավորվել 155 քաղաքացիներ:

Թուրքիայի իշխանությունները գտնում են, որ DHKP-C-ն գործում է Քրդստանի աշխատավորական կուսակցության (PKK) հետ համագործակցված. այս կազմակերպություններն, ըստ թուրքական հետախուզության, համատեղ «ահաբեկչական գործողություններ են ծրագրում անցկացնել»: