Ես չկարողացա և չեմ ցանկանում նմանվել եվրոպացի կանանց. Հասմիկ Պապյան

Այսօր Մարտի 8-ն է՝ Կանանց միջազգային օրը: Առիթը բաց չթողնելով՝ Past.am-ը մի քանի տոնական հարց ուղղեց նշանավոր օպերային երգչուհի, ՀՀ ժողովրդական արտիստ, սոպրանո Հասմիկ Պապյանին: Ինչպես հայտնի է, տիկին Պապյանը երկար տարիներ ապրում և աշխատում է Վիեննայում:

Անդրադառնալով Հայաստանի և Ավստրիայի կանանց տարբերություններին՝ երգչուհին նշեց, որ տարբերությունները շատ են և բազմազան: Ըստ նրա՝ հայ և եվրոպացի կանայք գտնվում են տարբեր բևեռներում՝ թե՛ զգացական տիրույթում, թե՛ աշխարհընկալումերով:

«Մի բան հստակ է՝ ես չկարողացա և չեմ ցանկանում իրենց նմանվել, հայ կանանց երազները տարբերվում են, թեպետ, անշուտ, բացառություններ միշտ էլ կան»,- հավելեց մեր զրուցակիցը: Արվեստագետի խոսքով՝ կնոջ խնդիրները վաղեմության ժամկետ չեն ճանաչում: «Կարծես թե միշտ նույնն է՝ սիրված, գնահատված լինելը»,- ընդգծեց նա:

Օպերային երգչուհին ասաց, որ նվերներ ստանալ չի սիրում, բայց գրքեր նախընտրում է: Միջազգային մեծ բեմեր նվաճած արտիստի կարծիքով՝ որոշ ժամանակ անց ցանկացած իր ավելորդ է դառնում:

Հասմիկ Պապյանը հետևյալ բարեմաղթանքները հղեց կանանց. «Հատկապես հայ կանանց մաղթում եմ արարելու և իրենց շնորհներն իրացնելու հնարավորություն, խաղաղ երկինք, իրենց զավակներին կայացած տեսնելու երջանկություն: Մնացած ամեն ինչն իրենք կստեղծեն»: Past.am-ը միանում է բոլոր մաղթանքներին:

Լևոն Փանոսյան