Սոնա Շահգելդյանը՝ Մարտի 8-ի տոնական համերգի և ամուսնու անակնկալների մասին

Life.panorama.am-ը գրում է.

Այսօր` մարտի 8-ին, Արամ Խաչատրյանի անվան համերգասրահում Կանանց միջազգային օրվան նվիրված համերգ տեղի կունենա, որին կմասնակցեն Սոնա Շահգելդյանը, Միշոն, Քրիստինե Պեպելյանը, Սոնան, Մհերը, Նորայր Մելքոնյանը եւ պարային համույթներ, իսկ երեկոն կվարեն Ֆուլ հաուսցիներ Գոռ Հակոբյանն ու Անի Երանյանը:

Life.panorama.am-ի հետ զրույցում Սոնա Շահգելդյանը տոնական համերգին ընդառաջ մանրամասներ է հայտնել ու պատմել, թե ինչպես է նախատեսում նշել կանանց օրը:

«Մեծ սիրով պետք է նշեմ, որ վաղը կայանալիք համերգին ես էլ եմ մասնակցելու ու այդպիսով երգով շնորհավորելու իմ սիրելի հանդիսատեսին: Եվս մեկ անգամ պետք է շնորհակալությունս հայտնեմ «AAd» պրոդյուսերական կենտրոնին եւ կազմակերպիչներին ինձ հրավիրելու համար. շատ ուրախ կլինեմ, որ մեր քաղաքում հաճախ այսպիսի համերգներ կազմակերպվեն, ես էլ մեծ ուրախությամբ կմասնակցեմ դրանց»,- մեզ հետ զրույցում նշեց Սոնան:

Հետարքրվելով, թե բացի համերգից երգչուհին տոնական օրն ինչպե՞ս կանցկացնի, Սոնա Շահգելդյանը պատմեց.

«Նախ նկատեմ, որ վաղը մի քանի համերգ ունեմ, ուստի զբաղվածությունս մեծ կլինի, բայց հաստատ ամեն ինչ կանեմ, որպեսզի հասցնեմ ամուսնուս հետ էլ նշել: Չնայած նկատեմ նաեւ, որ ամուսինս ինձ գրեթե միշտ ուղեկցում է համերգներին, մեծ հաշվով միասին ենք լինում, բայց հանգիստ ու գեղեցիկ պայմաններում էլ կփորձենք նշել»:

Սոնան ու ամուսինը սիրում են միմյանց անակնկալներ մատուցել, բայց երգչուհու խոսքերով՝ անակնկալներից բացի հաճախ նաեւ միմյանց ասում են, թե ինչ կցանկանան ստանալ.

«Դեռեւս չգիտեմ, թե ամուսինս ինչ անակնկալ կմատուցի ինձ, բայց գիտեմ, որ երկար է մտածում ինձ մի բան նվիրելուց առաջ, նա լավ ճաշակ ունի ու ես էլ վստահում եմ նրան: Երկուսս էլ սիրում ենք միամյանց նվիրել այնպիսի նվերներ, որոնք պետքական կլինեն մեզ եւ իսկապես կուրախացնեն»,- տոնական տրամադրությամբ նշեց երգչուհին:

Ի դեպ՝ Սոնա Շահգելդյանը նկատեց նաեւ, որ ինքն էլ է պատրաստվում նվերներ գնել. «Ինքս շատ եմ սիրում նվերներ տալ, ընտրում եմ այնպիսիք, որոնք նախապես գուշակել եմ, որ պետք կգան: Վաղը երեք կարեւոր նվեր ունեմ գնելու մայրիկիս, տատիկիս եւ ամուսնուս մայրիկին, ում հետ շատ լավ ընկերներ ենք: Դեռեւս չեմ կողմնորոշվում, թե ինչ կընտրեմ, բայց հուսով եմ, որ ինձ կհաջողվի նրանց սիրտը շոյել,- ասաց Սոնան ու հավելեց,- ինձ համար կարեւոր չէ նվերի արժեքը, ես շատ ավելի կարեւորում եմ այն տրամադրվածությունն ու անկեղծությունը, որը մարդ նվիրում է իր հարազատին ընտրած նվերի հետ միասին»,- ավելացրեց երգչուհին:

Հեղինակ՝ Անուշիկ Մելքոնյան