Կանանց տոնը՝ ծաղկավաճառների խնջույք. ի՞նչ արժեն ծաղիկները տոն օրերին

Եվրոպական երկրներում, որտեղ գործում են տնտեսությանը հատուկ գրված և չգրված օրենքները, տոներից առաջ սովորաբար տեղի են ունենում մեծ զեղչեր և ներկայացվում շահավետ առաջարկներ: Հայաստանի պես երկրներում, սակայն, նման օրենքները, չգիտես ինչու, չեն գործում: Հայաստանում մեծ պահանջարկը տնտեսվարողներին թույլ է տալիս սահմանել իրենց խաղի կանոնները: Այսպես, օրինակ՝ մարտի 8-ին ծաղկի բիզնեսով զբաղվողները փորձում են գերշահույթ ստանալ:

Past.am-ը ուսումնասիրություն է կատարել և պարզել, թե որքան են կազմում ծաղիկների և ծաղկային կոմպոզիցիաների գները տոն օրերին: Եվ այսպես, սովորական վարդը, որի գինը սովորական օրերին տատանվում է 500-700 դրամի սահմաններում, այսօր փողոցներում արժե 1000-1500 դրամ, հոլանդական վարդերը 1000-ից դարձել են 2000 դրամ, կակաչները 300 դրամից դարձել 600-700 դրամ: Տնտեսվարողներն ավելի մեծ շահույթ են ստանում ծաղկեփնջերից և ծաղկային կոմպոզիցիաներից: Օրինակ՝ սովորական 7 կակաչով ծաղկեփունջը 2000 դրամից դարձել է 4500 դրամ:

Ծաղկավաճառները, օրինակ՝ վերցնում են մի քանի վարդ, դեկորատիվ հնարքներ կիրառում, փունջ կապում և վաճառում շատ ավելի բարձր գնով, քան կարող էին վաճառել այդ վարդերն առանձին-առանձին: Օրինակ 3 հերբերայով, մի փունջ երիցուկով և երեք վարդով ծաղկեփունջը ձեր գրպանի վրա կարող է նստել 8 հազար դրամ և ավելի՝ կախված վարդի տեսակից: Վարդերով փոքրիկ ծաղկեփնջերի գինը մեր հարցումներից պարզվել է, որ կարող է սկսվել 6000 դրամից: Զամբյուղով ծաղիկները, որոնք սովորական օրերին սկսվում են 3500 հազար դրամից, այս տոներին կարելի է գտնվել նվազագույնը 5500 հազար դրամով: Անգամ սովորական օրերին 200 դրամով վաճառվող ձնծաղիկների գներն այս օրերին դառնում են 400-500 դրամ:

Հավելենք, որ ներկայացված գները նվազագույնն են, քանի որ ներկայանալի և շքեղ ծաղկեփունջ գնելու համար պետք է ծախսել 12 հազար դրամ և ավելի, իսկ էկոնոմ տարբերակը կարող է սահմանափակվել, օրինակ՝ երեք սովորական վարդով՝ մոտ 4500 դրամի չափով:

Լիլիթ Լալայան