Թույլ չենք տա Թուրքիային ներքաշել ավանտյուրայի մեջ. Դավութօղլու

Թող ոչ ոք տպավորություն չստեղծի, իբրեւ Թուրքիան ցանկացած պահի կներքաշվի պատերազմի մեջ:

Այս մասին, թուրքական A Haber հեռուստաալիքին տված հարցազրույցում հայտարարել է Թուրքիայի վարչապետ Ահմեթ Դավութօղլուն:

Նա նշել է, որ չնայած վերջին 5 տարիներին Թուրքիան գտնվում է «կրակե շրջանում»` փաստացի պատերազմի շեմին, Անկարային, այդուհանդերձ, հաջողվել է «պահպանել կայունություն եւ ժողովրդավարություն»:

«Մենք Թուրքիայի կայունությանը ոչ մի վնաս չենք հասցրել: Եվ թող ոչ ոք տպավորություն չստեղծի, իբր Թուրքիան ցանկացած պահի կարող է ներքաշվել պատերազմի մեջ: Մենք թույլ չենք տա Թուրքիային ներքաշել ավանտյուրայի մեջ», -ասել է Դավութօղլուն:

Նշենք, որ Թուրքիան իր տարածքից հաճախակի հրետակոծում է Սիրիայի հյուսիսում «Իսլամական պետություն» (ԻՊ) ահաբեկչական խմբավորման դեմ կռվող քրդական զինված ջոկատների դիրքերը` դրանով խանգարելով ԻՊ-ի ոչնչացմանը:

Դավութօղլուն խոսել է Թուրքիայում ներքին կայունության մասին` անտեսելով երկրում Քուրդիստանի աշխատավորական կուսակցության (PKK) հետ ներքին պատերազմում գտնվելու փաստը:

PKK-ի հետ Թուրքիայի զինված ուժերի զորամիավորումների բախումներում 2015 թվականին սպանվել են 200-ից ավելի զինծառայողներ, իսկ 2016 թվականի առաջին երկու ամսիներ ընթացքում` արդեն 100-ից ավելի զինծառայողներ: Թուրքիայի ամբողջ տարածքում գրեթե ամեն օր պայթյուններ եւ քրդերի հետ բախումներ են տեղի ունենում:

PKK-ն Թուրքիայում քրդերի ազատագրական շարժումը սկսել է 1984 թվականից: Մինչ այժմ PKK-ի հետ թուրքական ուժային կառույցների բախումներում 40 հազարից ավելի մարդ է զոհվել: