Սկանդալ. Մենչը զարմացած է «վիտամինցի» Գոռի հայտարարությունից

Blognews.am-ը գրում է.

«Վիտամին ակումբից» հայտնի դարձած Գոռ Բարսեղյանը, ով վերջերս Արա Կազարյանի հետ վարում էր «Արմնյուզ» հեռուստաընկերության «Ուշ երեկոյան» հաղորդաշարը, օրերս հարցազրույցներից մեկի ժամանակ հայտարարել է, որ հրավեր ունի նկարահանվելու «Ֆուլ հաուս» սիթքոմում։

Հետաքրքիր է, որ «Ֆուլ հաուսի» պրոդյուսեր Արմեն Պետրսյանը՝ Մենչը, տեղյակ չէ, որ Գոռը խաղալու է իր նախագծում։ BlogNews-ի հետ զրույցում Արմենն ասաց. «Ես առաջին անգամ լրագրողներից եմ լսել, որ Գոռը խաղալու է «Ֆուլ հաուսում»։ Նախ՝ մենք արդեն հայտարարել ենք ովքեր են լինելու նոր կերպարները։ Այդ տղայի մասին խոսակցություն նույնիսկ չի եղել, որովհետև էպիզոդիկ դերերի համար մենք եթերաշրջանից առաջ դերասաններ չենք ընտրում։ Սցենարն էլ այդքան երկար գրված չէ։ Այն, ինչ գրել ենք, արդեն նկարել ենք, թե ինչ կլինի 5  սերիա հետո, ոչ ոք չգիտի։ Ասեմ ավելին՝ եթե նույնիսկ իմանան էլ, մենք նախապես ոչ մի կեպարի վրա ոչ մի դերասանի չենք հաստատում։ Իր վերաբերյալ նույնիսկ խոսակցություն չի եղել։ Միակ մարդը, ով կարող է «Ֆուլ հաուսում» նկարվելու վերաբերյալ խոսել ինչ-որ մեկի հետ, դա ես եմ, իսկ ես ոչ ոքի հետ չեմ խոսել»։

Արմենից տեղեկացանք, որ անձամբ ճանաչում է Գոռին, քանի որ այժմ աշխատում են նույն հոլդինգում՝ «ՊանԱրմենիան Մեդիա Գրուպում»։ «Ես իրեն ճանաչում եմ, բայց այնպես չէ, որ ես ում ճանաչում եմ, նկարահանվում է«Ֆուլ հաուսում»»,- եզրափակեց նա։

Այս թեմայով պարզաբանում ստանալու համար BlogNews-ը կապվեց նաև Գոռի հետ։ Վերջինս հարցը լսելուց հետո ասաց, որ իրեն հարմար չէ խոսել և խնդրեց զանգահարել ավելի ուշ, սակայն այլևս չպատասխանեց հեռախոսազանգերին։

Նյութը՝ Ամալյա Հովհաննիսյանի