Ադրբեջանի Նարդարան ավանում դարձյալ լարվածություն է. 32 հոգի ձերբակալվել է

 Ադրբեջանից ոչ հեռու Նարդարան ավանում դարձյալ իրավիճակը լարվել է: Մի խումբ անձինք պատերին կրոնական (շիա) լոզունգներ եւ «կլուծենք մեր արյան վրեժը» բովանդակությամբ պաստառներ են կախել, ինչի պատճառով ոստիկանությունը գործողություն է իրականացրել եւ ձերբակալել ավանի 32 բնակչի:

Ինչպես հաղորդում է «Արմենպրես»-ը, այս մասին հայտնում է Meydan TV հեռուստաալիքի կայքը` նշելով, որ Բաքվի Սաբունչիի շրջանի ոստիկանության կողմից բաժանմունք տարված 32 հոգուց 24-ին ցուցմունք վերցնելուց հետո արդեն բաց են թողել, իսկ 8 հոգու նկատմամբ 20 օր վարչական կալանման որոշում է ընդունվել:

Նարդարանի բնակիչները «Ազատություն» ռադոիակայանի ադրբեջանական ծառայությանը հայտնել են, որ կատարվածը ավանի բնակչության դեմ իշխանությունների կողմից արված սադրանք է: Նրանց խոսքով` դա Նարդարանում հասարակական-քաղաքական իրավիճակը լարելու նպատակով հետաքրքրված անձանց կողմից արված գործողություն է:

Ադրբեջանցի շիաների կենտրոն համարվող Նարդարան ավանում նոյեմբերի 26-ին ՆԳՆ կողմից շիա հավատացյալների դեմ իրագործված բռնաճնշումների արդյունքում կալանավորվել են Ադրբեջանի շիաների առաջնորդ Թալե Բաղըրզադեն եւ եւս 32 հավատացյալներ: Ոստիկանների գործողությունները զայրացրել են Նարդարանի բնակիչներին: Նրանց եւ ոստիկանության միջեւ բախումներ են սկսվել: Փոխհրաձգությունների հետեւանքով երկու ոստիկան եւ 5 բնակիչներ սպանվել են: Հաջորդ օրերին իսլամիստների եւ ոստիկանության միջեւ բախումներ են սկսվել նաեւ Ադրբեջանի շրջաններում` Գյանջայում, Լենքորաում եւ այլ քաղաքներում:

Ադրբեջանի ՆԳՆ-ը եւ գլխավոր դատախազությունը միջադեպի առնչությամբ հայտարարություն է տարածել, որում ասվում է, որ «ավանի շիա առաջնորդները ծրագրում են բռնությամբ փոխել սահմանադրական կարգը եւ երկրում շարիաթի նոր օրենքներ մտցնել, ինչի նպատակով նրանք ստեղծել են «Մուսուլմանական միասնություն» անվամբ շարժում, սկսել են իրենց կողմնակիցներ հավաքագրել Բաքվում եւ երկրի շրջաններում եւ մատակարարել նրանց զենքով եւ պայթուցիկ նյութերով, խումբը Նարդարան ավանում անօրինական հավաք է անցկացրել` քննարկելով իշխանությանն անհնազանդության ակցիայի կազմակերպում, թռուցիկներ է բաժանել բնակչությանը եւ որոշել է պետական չինովնիկների ցուցակը, որոնց դեմ ահաբեկչական գործողություներ էր նախապատրաստվում»:

Բելգիայի Գենթի համալսարանի պրոֆեսոր Բրունո դե Կորդյեն, մեկնաբանելով նարդարանյան իրադարձություններն, ընդգծել է, որ այդ առիթով Ադրբեջանի իշխանութունների նյարդայնությունը պայմանավորված է արաբական գարնան հոգեբանական ազդեցությանբ եւ Ուկրաինայում իրադարձություններով: «Նրանք անհանգստացած են, որ ինչ որ նման բան կարող է տեղի ունենալ նաեւ իրենց մոտ», -ընդգծել է բելգիացի պրոֆեսորը:

Իրանի հոգեւոր առաջնորդ Ալի Խամենեի ներկայացուցիչ այաթոլլա Մոջթահեդ Շաբեսթարին եւ Իրանի խորհրդարանի անվտանգության եւ արտաքին քաղաքականության հանձնաժողովի փոխնախագահ Մանսուր Հագիգաթփուրը հայտարարել էին, որ եթե Բաքուն Նարդարանում վերջ չդնի շիաների դեմ բռնաճնշումները, Իրանի եւ Ադրբեջանի միջեւ հարաբերությունները կարող են վերանայվել` Նարդարանում իրադարձությունները որակելով որպես հեղափոխական շարժում:

Այաթոլահ Խամենեին` փետրվարի 23-ին Թեհրանում Ադրբեջանի նախագահ Իլհամ Ալիեւի հետ հանդիպման ժամանակ վերջինիս խորհուրդ է տվել հոգ տանել Ադրբեջանում շիաների մասին:

«Ինչքան շատ դա արվի, այնքան շատ կառավարությունը կստանա հասարակության աջակցությունը թշնամական տերութունների հետ դիմակայության մեջ: Ժողովուրդները պետք է դիմակայեն թաքֆիրական (աստվածանարգ) խմբերին: Կառավարությունը պետք է ժողովրդին խրախուսի պահպանել կրոնական ծեսերը եւ այն, ինչ միավորում է ժողովրդին», -ասել է Խամենեին: