Աղջկաս ծնունդից հետո ամեն բան ընտանիքիս հետ է կապվում. Անուշիկ Ալավերդյանը այսօր նշում է ծննդյան 28-ամյակը

Life.panorama.am-ը գրում է.

Այսօր՝ մարտի 2-ին, երգչուհի Անուշիկ Ալավերդյանի ծննդյան օրն է: Նորաթուխ մայրիկն այսօր դարձավ 28 տարեկան: Երգչուհու համար այս տարի խորհրդանշական է՝ նա ծննդյան օրն առաջին անգամ անցկացնում է մայրկիի կարգավիճակում.

«Շնորհավորանքներն ու զանգերը մեկնարկել են դեռ կեսգիշերից, առաջինը Փարիզից զանգեցին քույրս եւ իր ամուսինը, իսկ հետո արդեն սկսեցին մեկը մյուսի հետեւից զանգերը: Շատ հաճելի է, երբ մարդիկ հիշում ու շնորհավորում են ծննդյանդ օրը,- Life.panorama.am-ի հետ զրույցում նշեց Անուշիկն ու պատմեց, որ կեսգիշերին ծննդյան օրը սկսել է ընկերների հետ միասին,- Երեկ երեկոյան որոշեցի աղջկաս քնեցնեմ ու Կարենի հետ միասին գնանք «Ռեինկարնացիա» խմբի համերգին: Հենց այնտեղ էլ բարձր տրամադրությամբ եւ ոգեւորությամբ դիմավորեցի ծննդյանս առաջին ժամերը»:

Անուշիկը չցանկացավ կիսվել ամուսնու՝ դաշնակահար Կարեն Մամիկոնյանի անակնկալով. «Ամուսինս արդեն հանձնել է իր նվերը, բայց չեմ ցանկանա այդ մասին խոսել: Նման բաները ինձ համար շատ անձնական են եւ միայն իմը»,- ժպիտով նշեց երգչուհին:

Տոնական օրվա շարունակության մասին խոսելիս՝ օրվա հերոսուհին նկատեց. «Այս տարի հետաքրքիր զգացողություններ ունեմ. եթե նախորդ տարիներին մտածում էի մեծ խնջույքների մասին, որոնք կանցկացնեի ընկերներիս հետ, ապա այս տարի, երբ ունեմ իմ լիարժեք ընտանիքը, ուզում եմ ծննդյանս օրն անցլկացնել մտերմիկ մթնոլորտում՝ իմ ընտանիքի հետ: Այնպես որ, օրը կշարունակենք երեքով՝ ես, Կարենն ու Մայան. Սա ամենալավ ծնունդս է»:

Աղջկա ներկայությունը Անուշիկ Ալավերդյանի համար այս տարվա ամենամեծ նվերն է. «Սա առաջին ծննդյանս օրն է, ինչ Մայան կա իմ կյանքում: Կյանքս իսկապես ամբողջովին փոխվել է, աղջկաս ծնունդից հետո ամեն բան ընտանիքիս հետ է կապվում»,- նշեց նա:

Տոնական տորթի մոմերը փչելիս Անուշիկը երազանք կպահի, քանի որ հավատում է դրանց իրականացմանը, իսկ երազանքով նա չվախեցավ կիսվել. «Երազանքս մեկն է, որ ընտանիքս ու հարազատներս առողջ լինեն»:

Իսկ վերջում հարցին, թե տարիքի մասին երգչուհին մտածո՞ւմ է, հավելեց. «Արդեն մտածում եմ, որ մեծանում եմ, բայց միաժամանակ վայելում եմ յուրաքանչյուր տարիքս, իսկ 28-ը մի տեսակ առանձնահատուկ կերպով եմ սիրում, շատ լավ տարիք է, հուսամ այն ինձ համար կնշանավորվի լավ իրադարձություններով»:

Հեղինակ՝ Անուշիկ Մելքոնյան