«Ի՞նչ պատահեց այդ բարի կնոջը»․ դայակի հայրենիքում ցնցված են նրա արարքից (լուսանկարներ)

Արդեն մի քանի անգամ անդրադարձել ենք սարսափելի միջադեպին, երբ Մոսկվայում դայակը գլխատել էր 4 ամյա երեխային։ Ներկայումս ընտանիքի եւ դայակի ծանոթները նոր մանրամասներ են ներկայացրել նրանց կյանքից։ Ոստիկանները կարծում են, որ դայակը՝ Գուլչեխրա Բոբոկուլովան, նախ խեղդել է երեխային, ապա կացնով կտրել նրա գլուխն ու այրել բնակարանը։ Կնոջը ոստիկանները ձերբակալել էին մետրոյի կայարաններից մեկի մուտքի մոտ, որտեղ նա, երեխայի գլուխը թափահարելով, սպառնում էր պայթեցնել իրեն։ Ավելի ուշ նա խոստովանել է մեղքը։

Ընտանիքի մտերիմներից մեկը պատմում է, որ դայակին ընտրել են մի քանի թեկնածուների միջից, որոնց թվում նաեւ ռուս կանայք կային։ Դայակին խորհուրդ է տվել վերցնել սպանված փոքրիկի մոր՝ Կատյայի ընկերուհին։ «Փոքրիկը ծանր հիվանդ էր, ոչինչ չէր տեսնում, չէր լսում, չէր քայլում։ Իսկ Գուլյան լավ էր խնամում նրան, երբեք երեխայի հետ կոպիտ չի եղել»,- ասել է նա։

Իսկ ահա Ուսբեկստանի քաղաքացու դայակի ծանոթները պատմում են, որ ընտանիքում կնոջը լավ են վերաբերվել, առանձին սենյակ են տրամադրել, միշտ նրանց հետ է ապրել։ «Նա ռուսերեն լավ չէր խոսում, ինչ գումար վաստակեր, ուղարկում էր տուն՝ Ուզբեկստան։ Ես երբեք չեմ լսել, որ նա ամուսին ունի, գիտեի, որ 3 երեխա ունի, որոնցից ավագը 22 տարեկան է, Մոսկվայում է ապրել մոր հետ, բայց նրան արտաքսել են այստեղից»,- պատմում է կնոջ ծանոթներից մեկը։

Մեկուկես տարի առաջ ընտանիքը հիվանդ փոքրիկին տարել է Չինաստան՝ բուժման, 4 ամսով։ Այդ ընթացքում դայակը հայրենիք է վերադարձել ու այնտեղ ամուսնացել։ Ամուսնու մասին ոչինչ հայտնի չէ, միայն թե դրանից հետո կինը շատ էր փոխվել, միայն չադրայով էր փողոց դուրս գալիս, սկսել է սկայպով հաճախ խոսել ամուսնու հետ։

«Լսել եմ, որ վերջերս նոր ամուսնու հետ վիճել էր, այնպես էր գոռգոռացել, որ Կատյան խնդրել էր կամաց խոսել։ Թե ինչ պատահեց այդ բարի կնոջ հետ, չեմ պատկերացնում։ Եթե անգամ աֆեկտի տակ սպանել էր երեխային, տունն էլ վառել, որ հետքերը վերացնի, ապա ինչու էր փոքրիկի գլուխը կտրում, կամ ինչու էր փողոցում թափահարում այն»,- ասում են ծանոթները։ Ոստիկանները կապվել են նաեւ Բոբոկուլովայի հայրենի գյուղ, որտեղ զրուցել են տեղի ոստիկանապետի հետ։

Վերջինը, պարզվում է, կնոջն անձամբ է ճանաչում։ «Նախկին ամուսնու անունը Ռադմին Բոբոկուլով է, նա շատ տարիներ առաջ է բաժանվել Գուլչեխրայից։ Նա 3 որդի ունի, բոլորն այստեղ են ապրում, նրանց հայրն է խնամում, մեծը 20 տարեկան է, փոքրը՝ 14»,- ասել է ուզբեկ ոստիկանապետը։ Նա ասել է, որ հայրենիքում բոլորը խոսում են կնոջ արարքի մասին։ Բոլորը ցնցված են։

Պատրաստեց Past.am-ը: