Թուրքիայի մեջլիսում անվտանգության միջոցները խստացվել են

Թուրքիայի մայրաքաղաք Անկարայում փետրվարի 17-ին տեղի ունեցած ահաբեկչությունից հետո թուրքական մեջլիսում որոշվել է անվտանգության խստացման նոր միջոցներ կիրառել: Այս մասին տեղեկացնում է թուրքական «Հուրիեթ» պարբեր ականը:

Մեջլիսի տարածքի սահմանային այն հատվածները, որոնք պարսպապատված չեն, կպարսպապատվեն: Նախարարներին ուղեկցող անվտանգության մեքենաներն այսուհետ իրավունք չեն ունենա մուտք գործել մեջլիսի տարածք: 18:00-ից սկսած այցելուների մուտքն արգելված կլինի: Մեջլիսում հանդիպումների համար նախապես չգրանցված անձինք ներս չեն թողնվի: Պատգամավորների հետ մեջլիս եկած այցելուները հատուկ ստուգումներ կանցնեն, ինչից հետո նրանց կտրամադրվի ներս մտնելու քարտ:

Որոշվել է նաև, որ մեջլիս մտնող մեքենաներում պաշտոնյաների առկայությունը ստուգելու նպատակով մեքենայի հետևի ապակիները կբացվեն և ստուգումներ կիրականացվեն:

Թուրքիայի մայրաքաղաք Անկարայում փետրվարի 17-ի երեկոյան տեղի է ունեցել ահաբեկչություն, որի հետևանքով զոհերի թիվը հասել է 29-ի, վիրավորների թիվը 61 է: Պայթյունը տեղի է ունեցել Թուրքիայի զինված ուժերի գլխավոր շտաբից, ցամաքային, ծովային և օդային ուժերի հրամանատարության նստավայրերից, մեջլիսից, կառավարության կենտրոնական շենքից և ներքին գործերի նախարարությունից մոտ 200 մետր հեռավորության վրա: Զինվորական անձնակազմին տեղափոխող ավտոբուսը կարմիր լույսի տակ կանգնած է եղել, երբ մեկ այլ ականապատված մեքենա պայթել է այդ վայրում: Ահաբեկչությ ան պատասխանատվությունը ստանձնել է «Քուրդիստանի ազատության բազեներ» (TAK) կազմակերպությունը: TAK-ը կապված է Քրդական բանվորական կուսակցության (PKK) հետ, սակայն խմբավորումն աչքի է ընկնում իր ինքնուրույնությամբ և անկախությամբ: TAK-ն ԱՄՆ-ի կողմից ներառված է ահաբեկչական խմբավորումների ցուցակի մեջ: