Լարված իրավիճակ` Մալաթիայի տոնավաճառի մոտ. ոստիկանները փորձում են բացել կենդանի պատնեշը (թարմացվող)

Այս պահին «Մալաթիա» տոնավաճառի բազմաթիվ աշխատակիցներ փակել են տոնավաճառի հարակից Անդրանիկի փողոցը` պահանջելով իջեցնել վարձակալվող տաղավարների գները:

 

Քիչ առաջ բողոքող ցուցարարներին է մոտեցել տոնավաճառի տնօրեն Սամվել Ավետիսյանը: Բողոքի ակցիայի մասնակիցներից մեկն առաջ քաշեց առևտրականների խնդրանքները, որ բարձր վարձավճարի պայմաններում չեն կարողանում եկամուտ ունենալ և ձախողում են իրենց փոքր բիզնեսը: Ավետիսյանը նախ հիշեցրեց, որ իր ղեկավարության օրոք տաղավարների գներն իջեցվել են, ապա խորհուրդ տվեց, որ ովքեր չեն կարողանում եկամուտ ապահովել, հանձնեն տաղավարները և թույլ տան այլոց զբաղվել առևտրով:

 

«Ակցիայի կազմակերպումը ձերը չի, դրա համար եմ նեղվում: 4-5 կին, որ բացարձակ այստեղից չեն, կազմակերպեցին և կարողացան ձեզ հանել ոտքի... իմ ցավը դա է, որ բերեցին, ձեզ այստեղ կանգնացրեցին: Իմ ցավն այն է, որ ով ուզում է, կարողանում է ձեզ վրա ազդել, թե դուք գումարից խեղճացել եք»,- ասաց տոնավաճառի տնօրենը՝ սրտնեղելով, թե չպետք է բողոքեին իր դեմ:

 

Ի պատասխան՝ տնօրենի հետ բանակցող առտևտրական տղամարդը նշեց, որ կազմակերպողներն այդ վերը նշված կանայք չեն, այլ իրենք բոլորն «ուղեղ» ունեն: «Վիճակ չկա, առևտուր չկա ու այդ վիճակը բերել է այս բողոքին»,- ասաց բողոքի մասնակիցներից մեկը:

 

Ակցիայի մեկ այլ մանսակից ասաց, որ իրենք պատրաստ են դիմել կառավարություն, որպեսզի իջեցնեն տոնավաճառի տնօրենի վրա դրված հարկերը: Տնօրեն Ավետիսյաննը հորդորեց չխառնել Ազգային ժողովը կառավարության հետ:

 

Ակցիայի մասնակիցները և տնօրենը չեն կարողանում գալ ընդհանուր հայտարարի:

 

Այս պահին տեղակայված ոստիկանական ուժերը փորձում են բռնի ուժով բացել փակված ճանապարհը՝ հրելով և քաշքշելով առևտրականներին:

 

Լիլիթ Լալայան

 

 

 

Կիսվել