Երբ շշից ծորում է միանգամից պատրաստի «կոկտեյլ». «Փաստ»

«Փաստ» օրաթերթը գրում է.

Եթե ալկոհոլային խմիչքների միջև ստեղծագործական մրցակցություն լիներ, Baileys ընկերության արտադրողների այս ինքնատիպ լիկյորը՝ Շերիդանսը, երևի թե, կզբաղեցներ առաջին տեղը, ասենք՝ սև օղու հետ միասին։ Նշենք, որ իռլանդական Gilbey ընկերությունն է մշակել ժամանակակից ամենատարածված լիկյորներից մեկը՝ Baileys Cream-ը, սալորի լիկյորը։ Այդ խմիչքի հաջողությունն էլ, զուգորդված աճող մրցակցության հետ, իռլանդական Baileys ընկերության աշխատակիցներին դրդել է փնտրել նույնքան ինքնատիպ խմիչք, որը ոչ միայն կգրավի մատակարարներին, այլ նաև կշրջանցի մրցակիցներին։ Այդ գործում հաջողության է հասել Gilbey-ի դուստր ձեռնարկություններից մեկը՝ Sheridan & Sons-ը։ Այնտեղ էլ ստեղծվել է այն խմիչքը, որը 1994 թվականին թողարկվելուց հետո անմիջապես անհետացել է խանութների դարակներից, այնքան արագ է սպառվել։

Դա հիմնականում պայմանավորված է եղել Sheridan's լիկյորի հիանալի համով, որը շատերին հիշեցնում է նուրբ իտալական աղանդերը՝ տիրամիսուն։ Սակայն ոչ պակաս կարևոր է մարքեթինգային հնարքը, այն է՝ հարթ ուրվագծերով անսովոր շշի ստեղծումը, որը բաղկացած է երկու հատվածից։ Դրանցից մեկը պարունակում է սպիտակ, կրեմային վանիլային լիկյոր՝ նուրբ համով, պատրաստված հացահատիկի սպիրտով և թարմ իռլանդական կրեմով։ Երկրորդը պարունակում է հարուստ, մի փոքր կտրուկ համով մուգ լիկյոր՝ սուրճի և մուգ շոկոլադի բույրերով։ Բայց դա դեռ ամենը չէ. գլխավոր առանձնահատկությունն այն է, որ մուգ լիկյորը կրկնակի ավելի շատ է, քան բաց լիկյորը, և հատուկ կափարիչի շնորհիվ դրանք թափվում են 2:1 հարաբերակցությամբ և խառնվում բաժակի մեջ։ Այսինքն, երբ լիկյորը լցնում եք բաժակի մեջ, ստանում եք պատրաստի կոկտեյլ՝ ներքևում ավելի ծանր, մուգ մասով, իսկ վերևում բաց, կրեմային մասով։ Պարզապես պետք է բռնել շիշը այնպես, որ երկու բացվածքներն էլ զուգահեռ լինեն և բաժակից բարձր չլինեն։ Ի դեպ, գիտակները դեռևս վիճում են, թե ինչպե՞ս խմել Շերիդանսը՝ թողնել այն շերտավորված, թե՞ խառնել երկու մասերը։

Ներկայում, սուրճ-շոկոլադե տարբերակից բացի, ընկերությունը արտադրում է նաև հատապտղային Շերիդանս։ Շշի մեկ երրորդը կրեմային լիկյոր է, իսկ երկու երրորդը՝ կարմիր հատապտղի լիկյոր։

Հայաստանում Sheridan’s-ը հանդիպում է ալկոհոլային խմիչքների տեղական առցանց վաճառքի տեսականու մեջ, այսինքն՝ ապրանքանիշը հայկական շուկայում լայնորեն ներկայացված է, և դժվար չէ այն գտնել:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում