Մեծամորում մեկնարկել է «Մեծամոր Ռեզիդենս» բնակելի համալիրի շինարարությունը

Մեծամորում մեկնարկել է նոր քաղաքաշինական ծրագիր։ ՀԱԷԿՇԻՆ ընկերությունը սկսում է «Մեծամոր Ռեզիդենս» բազմաֆունկցիոնալ բնակելի համալիրի կառուցումը։

Շինարարության մեկնարկն ազդարարվեց ապագա համալիրի տարածքում կազմակերպված միջոցառմամբ, որին մասնակցում էին պետական և տեղական ինքնակառավարման մարմինների ներկայացուցիչներ, կառուցապատման ոլորտի մասնագետներ, ընկերության գործընկերներ և հյուրեր։

ՀԱԷԿՇԻՆ-ի և Մեծամորի պատմությունը կապված է ավելի քան կես դար։ 1969 թվականին ստեղծված ՀԱԷԿ-ի շինարարական վարչությունը եղել է ոչ միայն ատոմային էլեկտրակայանի, այլև ձևավորվող քաղաքի կառուցապատողը։ ՀԱԷԿՇԻՆ-ի ջանքերով կառուցվել են Մեծամորի բազմաթիվ բնակելի և այլ նշանակության շենքեր, իսկ ընկերությունում տասնամյակներ շարունակ աշխատել և այսօր էլ աշխատում են քաղաքի հարյուրավոր բնակիչներ։

«Մեծամոր Ռեզիդենսը» բաղկացած է լինելու չորս բազմաբնակարան մասնաշենքից։ A և B մասնաշենքերը կլինեն 12-հարկանի, C-ն՝ 14, D-ն՝ 16-հարկանի։

Նախատեսված են ստուդիաներ, երկու, երեք և չորս սենյականոց բնակարաններ՝ 32,7-ից մինչև 87,4 քառակուսի մետր մակերեսով։

Համալիրում նախատեսված են բարեկարգ և կանաչապատ բակային տարածքներ, մանկական խաղահրապարակ, ֆուտբոլի խաղադաշտ և ստորգետնյա կայանատեղի։ Առաջին հարկերը նախատեսված են առևտրային և սպասարկման օբյեկտների համար։

Նախագծի հիմքում ոչ միայն բնակարանների կառուցման, այլև առօրյա կյանքի համար անհրաժեշտ պայմաններով ամբողջական թաղամաս ձևավորելու գաղափարն է։

Կարևորվում է նաև համալիրի տեղադրությունը։ Մեծամորի հետագա քաղաքաշինական զարգացման պատկերացումներով՝ քաղաքի ընդլայնման ուղղություններից մեկը հենց այս հատվածն է։

Նոր կառուցապատումը հնարավորություն կտա աստիճանաբար յուրացնել այս տարածքը և այն կապել քաղաքի ընդհանուր կառուցվածքին։ Ծրագրի իրականացումը կարող է նպաստել նաև հարակից տարածքների բարեկարգմանը և սպասարկման նոր հնարավորությունների ձևավորմանը։

Մանրամասները՝ տեսանյութում.