Տիգրանաշենը կունենա նոր շուկա, խաղահրապարակ և ավտոբուս. ինչպիսին կլինի ապագա համայնքը

ԱԺ «Ուժեղ Հայաստան» խմբակցությունը Տիգրանաշենում մի շարք ծրագրերի իրականացման նախաձեռնությամբ է հանդես գալիս։ Նախատեսվող աշխատանքների ֆինանսավորումն իրականացվելու է պատգամավորներին փոխանցված պարգևավճարների միջոցների հաշվին։ Այս մասին տեսաուղերձում հայտնել է խմբակցության քարտուղար Տիգրան Աբրահամյանը։

Նրա խոսքով՝ նախատեսվող կարևոր ծրագրերից մեկը Տիգրանաշենում գյուղմթերքի շուկայի ստեղծումն է։ Նախաձեռնության նպատակը գյուղացիներին սեփական արտադրանքը վաճառելու և իրենց աշխատանքի արդյունքն ավելի արդյունավետ իրացնելու հնարավորություն տալն է։ Աբրահամյանը նշել է, որ Տիգրանաշենի ռազմավարական դիրքը և Հյուսիս-հարավ ավտոճանապարհի բանուկ հատվածներից մեկի հարևանությամբ գտնվելը հիմք են տալիս ակնկալելու, որ շուկան պահանջված կլինի։

Ինչպես հայտնում է Past.am-ը, ծրագրերի շրջանակում նախատեսվում է ուշադրություն դարձնել նաև համայնքի ենթակառուցվածքներին և երեխաների համար նախատեսված պայմաններին։ Տիգրանաշեն կատարած այցի ընթացքում արձանագրվել է, որ գյուղի գործող մանկական խաղահրապարակը թարմացման կարիք ունի։ Այդ պատճառով որոշվել է համայնքում կառուցել նոր, ժամանակակից խաղահրապարակ՝ նախատեսված տեղի երեխաների համար։

Առանձին անդրադարձ է կատարվել նաև տրանսպորտային խնդրին։ Տիգրանաշենի դպրոցը չգործելու պայմաններում բնակիչները ստիպված են երեխաներին առավոտյան տեղափոխել հարևան բնակավայրերի դպրոցներ, իսկ դասերից հետո կրկին տուն վերադարձնել։ Խնդրի լուծման նպատակով նախատեսվում է համայնքի համար ձեռք բերել ավտոբուս։ Այն նախատեսված է աշակերտների կանոնավոր և անվտանգ տեղափոխման համար, ինչպես նաև հնարավորություն կտա տիգրանաշենցիներին ավելի հեշտ հասնել մարզկենտրոն և Երևան։

Past.am-ի փոխանցմամբ՝ Տիգրան Աբրահամյանը նախաձեռնության ամփոփման ժամանակ ընդգծել է, որ Տիգրանաշենի բնակիչները պետք է հնարավորություն ունենան ապրել և ստեղծագործել իրենց հայրենի հողում։ Նրա խոսքով՝ այս ծրագրերի հիմնական գաղափարն է՝ «Զարգացում, այլ ոչ թե հանձնում»։

Մանրամասները՝ «Փաստ» օրաթերթի այսօրվա համարում